Aneksimi i rajoneve të Ukrainës nga Rusia, i cili duhet të përfundojë të premten, “nuk ka vend në botën moderne”, tha Sekretari i Përgjithshëm i Kombeve të Bashkuara Antonio Guterres.
Presidenti rus Vladimir Putin do të nisë aneksimin zyrtar të 15 për qind të territorit ukrainas të premten dhe do të kryesojë ceremoninë e nënshkrimit të marrëveshjes për aneksimin e katër rajoneve të Ukrainës në Rusi, transmeton AFP.
“Çdo vendim për të vazhduar me aneksimin e rajoneve ukrainase të Donetskut, Luhanskut, Khersonit dhe Zaporozhyes nuk duhet të ketë asnjë vlerë ligjore dhe meriton dënim,” tha shefi i OKB-së.
“Është kundër gjithçkaje që duhet të përfaqësojë komuniteti ndërkombëtar. Ajo tradhton qëllimet dhe parimet e OKB-së. Është një përshkallëzim i rrezikshëm. Nuk ka vend në botën moderne. Nuk duhet pranuar.”
Rezoluta e dënimit në përgatitje
Ai theksoi se “çdo vendim rus për të vazhduar në atë drejtim do të rrezikojë më tej shanset për paqe”.
“Ai do të zgjasë ndikimet dramatike në ekonominë globale, veçanërisht në vendet në zhvillim, dhe do të pengojë aftësinë tonë për të ofruar ndihmë urgjente në Ukrainë dhe më gjerë,” shtoi ai.
“Është koha për t’u larguar nga humnera”.
Shtetet e Bashkuara të Amerikës dhe Shqipëria po përgatisin një rezolutë që dënon “referendumet” në Ukrainë që janë dënuar nga Perëndimi.
Teksti fillimisht do t’i paraqitet Këshillit të Sigurimit të OKB-së, ku ka të ngjarë të bllokohet nga vetoja ruse, përpara se të paraqitet më vonë në Asamblenë e Përgjithshme të OKB-së, ku asnjë nga 193 vendet anëtare nuk ka të drejtën e vetos. /tesheshi.com/
