Partia Demokratike po përjeton përçarjen e saj të radhës. Të përjashtuarit nga listat e kandidatëve për deputetë nga kryetari i partisë, Lulzim Basha, po nisin një lëvizje kundër tij brenda partisë.
Edhe pse nuk ka akoma një organizim të mirëfilltë mes gjithë zërave kundër dy prej tyre, që janë pjesë e kastës së vjetër të kësaj partie, Jozefina Topalli dhe Arben Imami kërkuar sot shkarkimin e Lulzim Bashës nga drejtimi i partisë para 25 qershorit/
Në një konferencë për mediat dy deputetët e PD-së, dhe pjesë e strukturave drejtuese të saj, thanë se lista e re është një listë personale e Bashës dhe një listë humbëse në këto zgjedhje.
Ata kërkuan mbledhjen e forumeve të PD-së për shkarkimin e Bashës.
“Nuk mund të largohet Edi Rama me shkatërrimin e PD-së. Vendimi për listat është marrë në shkelje të statutit dhe çdo procedure normale. Si zgjidhje të vetme kërkojmë mbledhjen e forumeve të PD-së, shkarkimin e personit përgjegjës që në këtë rast është kryetari i PD-së, Lulzim Basha. Kjo është listë humbëse. Nuk mund të rrëzohet Edi Rama kështu”– tha Arben Imami, një themelues i PD-së dhe ish-ministër në qeverisjen e Berishës.
Ndërsa Topalli, ish-kryetare e Kuvendit dhe ish-nënkryetare e PD-së, thotë se PD-ja nuk është më partia e demokratëve.
“Kam pasur një dyshim prej kohësh që kjo nuk është PD-ja, sot nuk kam asnjë dilemë që kjo nuk është PD-ja që unë njoh, me të cilën unë kam punuar dhe jam rritur. Kjo është një parti, logon e së cilës e ka marrë Lulzim Basha për llogari të interesave familjare, klienteliste të tij. Lista në terësinë e saj, me pak përjashtime, është lista e familjes Basha, bizneseve të tyre dhe klientëve të tij”.
Jam këtu për të luftuar kundër Edi Ramës, Lulzim Bashës dhe Ilir Metës. Nuk mund të kapet vendi nga tre veta që bëjnë lojë me njëri-tjetrin. Që në ditën e parë kur ka zbritur nga avioni unë nuk e kam mbështetur asnjë ditë Lulzim Bashën. Kam diferenca të mëdha me të”, u shpreh Topalli.
Para konferencës ajo u nisi një letër të hapur mediave ku shfaqte rezervat e saj për listën dhe premtonte që nuk do të ikte nga politika dhe pse Basha e la jashtë PD-së. /tesheshi.com/
