Rexhep Selimi, 49 vjeç, një ndër krerët e Vetëvendosjes dhe një nga themeluesit UÇK-së, u vetëshpall i pafajshëm për akuzat e krimeve të luftës në paraqitjen e tij të parë në Hagë, në ballafaqim me akuzat e Speciales.
Pasi u lexua aktakuza në një version më të redaktuar, Selimi u deklarua i pafajshëm për aktakuzën e ngritur kundër tij.
“Unë deklaroj se nuk jam fajtor për asnjë akuzë të aktakuzës,” tha ai.
Selimi tha se ai, si anëtar i Kuvendit të Kosovës, foli kundër themelimit të Gjykatës Speciale dhe se ishte i vetëdijshëm se ë’’përfaqëson kjo gjykatë.
“Rolet tona janë të ndara, ne jemi në anët e kundërta, por është e njëjtë për të gjithë ne që drejtësia është mbi gjithçka. Aktakuza është e gjatë, por e pavërtetë dhe e padrejtë për mua,” tha Selimi.
Ai tha se Serbia porositi një raport nga Dick Marty, i cili ishte baza për krijimin e gjykatës, pasi Gjykata Ndërkombëtare e Drejtësisë (ICJ) shqyrtoi ligjshmërinë e deklaratës së pavarësisë së Kosovës dhe vendosi në favor të Kosovës.
“Kjo gjykatë është një fakt dhe unë nuk jam këtu si anëtar i Kuvendit, por si një luftëtar i UÇK-së dhe një nga themeluesit e UÇK-së, i vetëdijshëm për rëndësinë dhe seriozitetin e kësaj gjykate”, tha Selimi, duke shtuar se ai do të provonte se lufta e UÇK-së ishte korrekte, çliruese dhe do të mbetet i tillë edhe pas këtij gjyqi.
“Të gjithë gjyqtarët do të binden se ne nuk jemi një grup i bashkuar kriminal. Unë kam luftuar kundër Serbisë, e cila ishte një okupatore, duke vrarë, duke kryer spastrim etnik, shpërngulje … Unë jam vetëm një çlirimtar. Ne filluam luftën për liri me Adem Jasharin dhe përfunduam me Gjeneralin (Ëeslley) Clark,” tha Selimi.
Mbrojtja ka njoftuar se do të kërkojë lirimin e përkohshëm të Selimit, pasi ai u vetëdorëzua dhe nuk ka rrezik për arratisjen e tij, dhe as nuk ka ndonjë tregues se Selimi do të ndikonte në dëshmitarë ose prova.
Prokuroria e Specializuar arrestoi Selimin më 5 nëntor, i cili u transferua në ambientet e paraburgimit të Këshillave të Specializuara në Hagë në të njëjtën ditë.
Në aktakuzë, të konfirmuar më 26 tetor, Selimi akuzohet për gjashtë akuza të krimeve kundër njerëzimit dhe katër akuza të krimeve të luftës, përkatësisht përndjekje, burgosje, tortura, zhdukje me forcë dhe vrasje. /tesheshi.com/
