Sekretari amerikan i Shtetit do të vizitojë nesër Turqinë, me një varg çështjesh që presin për t’u ridiskutuar mes dy aleatëve, SHBA-së dhe Turqisë, që së fundi kanë pasur fërkime në disa fusha.
Rex Tillerson është zyrtari më i lartë amerikan që e viziton Ankaranë që prej hyrjes së Donald Trump-it në Shtëpinë e Bardhë.
Një temë që pritet të zërë vend qendror në bisedat zyrtare me krerët e shtetit turk është ajo e ekstradimit të Fethullah Gülen-it, të akuzuar nga Ankaraja për organizimin e përpjekjes së dështuar për grusht shteti.
Ekstradimi i tij nga Amerika kërkohet prej kohësh; diçka që nuk mundi të realizohej sa qe Obama president.
Situata në Siri do të diskutohet gjithashtu. Një “zonë e përkohshme stabiliteti”, e bazuar në armëpushimin, është ajo çka raportojnë mediat turke se do të diskutojë sekretari amerikan i Shtetit.
Ofensiva për marrjen e Rakkasë, që gjendet nën kontrollin e ISIS-it, e po ashtu mbështetja që amerikanët vazhdojnë të japin për YPG-në, të cilën Turqia e konsideron degën siriane të PKK-së, zënë vend në axhendën e diskutimeve të ditës së nesërme. /tesheshi.com/
