Gjyqtarët dhe prokurorët shqiptarë nuk i shpëtojnë asnjë rasti për të treguar se janë një lloj sindikate, ose ndryshe korporate, që mbrojnë njëri-tjetrin.
Rasti më i fundit është mbledhja Këshillit të Lartë të Drejtësisë, institucion që po punon në tranzicion, i cili ka rrëzuar 12 kërkesat e Ministrisë së Drejtësisë për të shkarkuar 12 gjyqtarë që janë hetuar nga prokuroria për shkelje apo abuzim me pasurinë.
Thuajse të gjithë anëtarët e KLD-së, përveç Presidentit të Republikës dhe ministres së Drejtësisë, Etilda Gjonaj kanë votuar kundër shkarkimit të gjyqtarëve.
Siç bëhet e ditur nga burime pranë KLD-së, ka qenë Gjin Gjoni ai që i pari ka hedhur poshtë kërkesën e Gjonajt, duke deklaruar se nuk ka të drejtë askush të prekë gjyqtarët qoftë edhe për pasurinë e tyre.
Gjoni, anëtar i hershëm në KLD dhe një nga gjyqtarët kryesorë të Apelit ka qenë i ndjekur penalisht nga Prokuroria por dosja e tij u mbyll më vonë nga organi i akuzës.
Gjoni në fjalën e tij, u çudit se pse publiku kërkon të ndëshkohen më shumë se dy të tretat e gjyqtarëve.
“Ky Këshill i Lartë i Drejtësisë, për një periudhë kohore të gjatë, ka arritur që të shkarkojë deri në momentin aktual një numër, të paktën 10-15 gjyqtarësh deri në momentin aktual. Pavarësisht se nuk është ndonjë çudi e madhe sepse publiku, për shkak të këtij pompoziteti dhe propagande që është komentuar dhe trumentuar, kërkon që 80% e gjyqtarëve të dalin jashtë sistemi”, tha Gjin Gjoni.
Ministrja Gjonaj ka kërkuar shkarkimin e 12 gjyqtarëve.
Ja kërkesat e plota:
“Procedim ndaj gjyqtarit të Gjykatës së Rrethit Gjyqësor Tiranë, Ardian Kalia; gjyqtares së Gjykatës së Rrethit Gjyqësor Durrës, Shpëtime Pitaku; Propozim për shkarkim “Shkarkimit nga detyra”, për probleme në deklarimin e pasurisë ILDKPI-së. Nuk miratohet
Shqyrtimi i kërkesës së ministrit të Drejtësisë për procedimin disiplinor shkarkim nga detyra të gjyqtares së Gjykatës së Rrethit Gjyqësor Durrës, Dhurata Bilo.
Për shkarkim nuk miratohet
Shqyrtimi i kërkesës së ministrit të Drejtësisë, për procedimin disiplinor të gjyqtarit të Gjykatës Administrative të Shkallës së Parë Vlorë, Astrit Shema. Propozim për shkarkim, nuk miratohet.
Shqyrtimi i kërkesës së ministrit të Drejtësisë për procedimin disiplinor të gjyqtarit të Gjykatës së Rrethit Gjyqësor Elbasan, Tomorr Kullolli. Për shkarkim nuk miratohet.
Shqyrtimi i kërkesës së ministrit të Drejtësisë për procedimin disiplinor të gjyqtares së Gjykatës së Rrethit Gjyqësor Berat, Matilda Llangozi. Për Shkarkim nuk miratohet.
Shqyrtimi i kërkesës së ministrit të Drejtësisë për procedimin disiplinor të gjyqtares së Gjykatës Administrative të Shkallës së Parë Vlorë, Gentiana Xhelili. Masë disiplinore “Vërejtje me paralajmërim”. Nuk miratohet.
Shqyrtimi i kërkesës së ministrit të Drejtësisë për procedimin disiplinor të gjyqtarit të Gjykatës së Rrethit Gjyqësor Mat, Ali Koleci. Nuk miratohet.
Shqyrtimi i kërkesës së ministrit të Drejtësisë për procedimin disiplinor të gjyqtarit të Gjykatës së Rrethit Gjyqësor Vlorë, Laurent Fuçia. S’ka kourum nuk shqyrtohet.
Vazhdimi i shqyrtimit të kërkesës së ministrit të Drejtësisë për procedimin disiplinor të gjyqtares së Gjykatës së Rrethit Gjyqësor Sarandë, Enkeleda Doda. (Procedimi disiplinor është pezulluar me vendimin nr. 18, datë 15.01.2016.)
Propozohet “Shkarkim nga detyra” nga Ministria e Drejtësisë. Rrëzohet.
Çështja e gjyqtarit Rasim Doda. për masën disiplinore ndaj tij të “Shkarkimit nga detyra”. Rrëzohet.
Shqyrtimi i kërkesës së ministrit të Drejtësisë për procedimin disiplinor të gjyqtarit të Gjykatës së Rrethit Gjyqësor Durrës, Petraq Çurri. Pikë e shtyrë.
Presidenti i Republikës, Ilir Meta i cili është edhe kryetari i KLD-së ka votuar njësoj si ministrja e Drejtësisë, pra pro shkarkimit apo masave të tjera ndaj gjyqtarëve. Kurse të gjithë anëtarët e tjerë të KLD-së, që janë gjyqtarë por edhe të zgjedhur nga Kuvendi kanë qenë të gjithë kundër masave për kolegët e tyre.
Gjin Gjoni, ka qenë më i zellshmi në kundërshtimin e masave, por edhe kreu i shoqatës së Gjyqtarëve, Gerti Hoxha. /tesheshi.com/
