Qëndrimi i LSI-së sot jashtë parlamentit, por pranë tij, siç foli Petrit Vasili në oborrin e Kuvendit, ishte ajo që tesheshi.com e kishte shpallur pak ditë më parë: pra luftën totale ndaj Edi Ramës.
Në mënyrë të hapur, Vasili mbajti një qëndrim gati të njëjtë me Partinë Demokratike, duke futur në qerthull të ashtuquajturin “Planin B” të reformës, pra votimin e draftit nga deputetët ku PS-LSI-PDIU-së i duhen vetëm 4 vota për ta votuar draftin në Parlament.
Fiks një javë përpara 21 korrikut, Ilir Meta, ka rritur stekën aq shumë sa duket se tashmë amerikanët, BE-ja dhe Edi Rama nuk kanë përballë vetëm Lulzim Bashën, por edhe LSI-në.
Por ç’ndodh realisht? Cila është lëvizja e Metës?
Në mënyrë të qartë, Ilir Meta kërkon që 20 votat e LSI-së të mos defaktorizohen, ashtu si realisht po mundohen ndërkombëtarët ta bëjnë, duke luftuar fort në një pakt Basha-Rama.
Zyrtarja e lartë e Uashingtonit, Victoria Nuland, ka injoruar hapur Metën duke i dorëzuar propozimin për konsensus vetëm PS-së dhe PD-së.
LSI-ja reagoi ashpër ndërmjet Petrit Vasilit, por Rama nuk lëvizi.
Në seancën e sotme të Kuvendit, kryeministri thuajse nuk qëndroi në podiumin e ministrave por në ulëset e platesë, ku u pa duke biseduar vazhdimisht me ish-kryeministrin Pandeli Majko.
Qëndrimi aktual i Metës, është një rritje e pazarit që ai të faktorizohet politikisht nga ndërkombëtarët për reformën. Dhe ajo që është më e rëndësishmja, Ilir Meta i ka kërkuar urgjent Edi Ramës ndryshimin e kabinetit qeveritar, si “kurban” i votave të tij për reformën në drejësi.
Mediat pranë Metës po flasin për një “kataklizmë” pas 21 korrikut.
Portali i Artur Zhejit flet për “fundosje” të qeverisë, kurse gazeta “Sot” akuzon ndërkombëtarët për pazare.
Ilir Meta kërkon të rikthehet në tryezën e bisedimeve, duke prishur dualitetin Rama-Basha.
Por ndërkombëtarët këtë nuk e preferojnë, madje po bëjnë ç’mos që kjo të mos ndodhë.
Ndaj Meta nuk po rri duarkryq. Mediat pranë tij po e akuzojnë si “qengj”, por kreu i LSI-së, preferon ta quajnë “luan” dhe ka nisur me kërcënimet.
Nëse Basha prej kohësh bërtet për “djegie mandatesh”, Meta sot ngriti zërin nëpërmjet Vasilit për “votë kundër”.
Po tani ç’do të ndodhë?! Edi Rama nuk ka folur fare dhe nuk është takuar me Ilir Metën siç ka bërë përpara çdo séance parlamentare.
Ndërkohë, negociatorja e BE-së që ka mbërritur sot nuk do të zhvillojë asnjë takim me LSI-në.
Siç duket, taktika është që t’i lënë LSI-së “mundësinë fakultative” për të vepruar më 21 korrik.
Zëra pranë mazhorancës kanë folur sot për një “lëvizje të beftë” nga darka. Që ka të bëjë me qeverinë…
/tesheshi.com/
