Forcat speciale të Maqedonisë kanë përdorur gazin lotsjellës për të shpërndarë mijëra refugjatë, të cilët synonin hyrjen në Maqedoni nga Greqia, në pikën kufitare Gjevgjeli, raporton agjencia Reuters.
Mijërat e refugjatëve Lindja e Mesme, Afrika dhe Azia, shumica prej tyre sirianë, kanë kaluar natën në zonën kufitare, pasi Maqedonia shpalli të enjten gjendjen e krizës dhe mbylli kufirin e saj jugor.
“Forcat speciale të policisë, prapa telave me gjemba, kanë hedhur gaz lotsjellës kundër turmës së zemëruar, që ka kërkuar të kalojë në Maqedoni”, ka thënë korrespondenti i agjencisë Reuters, që ndodhet në vendin e ngjarjes.
Sipas policisë maqedonase, deri tani, në këtë vend kanë hyrë mbi 40 mijë migrantë, por ky numër vlerësohet të jetë shumë më i lartë për shkak të hyrjeve të shumta klandestine.
Sipas ligjit, deklarimi i gjendjes së krizës lejon “angazhimin e duhur të ushtrisë”. /tesheshi.com/
