Presidenti turk, Erdogan thotë se ka prova që forcat e koalicionit të udhëhequra nga SHBA-të, kanë ndihmuar në mbështetjen e terroristëve në Siri – përfshirë ISIS-in, raporton Reuters
Duke folur të martën në kryeqytetin turk, Ankara, ai tha se besonte se ata i kishin dhënë mbështetje grupeve të ndryshme militante, përfshirë ISIS-it si dhe militantëvë kurdë të YPG dhe PYD.
“Ata na kanë akuzuar ne për mbështetje të Daesh-it (Shtetit Islamik). Tani ata po japin mbështetje për grupet terroriste, përfshirë Daesh-in, YPG, PYD. Është shumë e qartë. Ne mund të konfirmojmë këtë me prova, fotografi dhe video”, citon Reuters deklarimet e Erdoganit.
Ndërkaq, kreu i shtetit turk tha të martën se Arabia Saudite dhe Katari duhet t’i bashkangjiten takimit me Rusinë dhe Iranin për të diskutuar përpjekjet për paqe në Siri.
Rusia, Turqia dhe Irani, të cilët ndihmuan për ndërmjetësimin e tërheqjes së civilëve të militantëve nga Halepi lindor, kanë rënë dakord që të mbajnë bisedime për Sirinë në Kazakistan muajin e ardhshëm.
Sipas Associated Press, Erdogan përmendi se takimi i ministrave të jashtëm duhet të përfshijë dhe Arabinë Saudite me Katarin, duke thënë se ata kishin “treguar vullnet të mirë dhe kanë ofruar mbështetje” në Siri. /tesheshi.com/
