Sot me rastin e 1 Majit, Ditën së Solidaritetit Ndërkombëtar të Punonjësve siç quhej në atë kohë, zgjodhëm një shkrim-retro të para 70 viteve. Interesante është narrativa e varfër gazetareske, por dhe shqipja e asaj kohe e pafutur ende në “repartin” e standartizimit siç do të ndodhte afro 30 vite më vonë. Vihet re gjithashtu se ende nuk ishte futur në përdorim statusi i nderimit “shoku”, karakteristikë në regjimet komuniste, por ende vijohej me “z”-në,-“zoti”
Tirana, kryeqytet`i Republikës sonë festoi me madhështi dhe enthuziazëm 1 Majin, ditën ndërkombëtare të punëtorëve. Për këtë ditë të shënuar ajo u mvesh me blerim të kuq, me portete të mëdha, të Marksit, Engelsit, Leninit dhe Stalinit e të shokut Enver Hoxha dhe me parrulla të shumta, në një mënyrë të posaçme dhe të shkëlqyer.
Në bulevardin “Shqipëria e re”, që prej sheshit “Skënderbeg” dhe gjer në pallatin e Ministrisë së Mbrojtjes Kombëtare, u grumbulluan dhjetra mijra vetë, të cilët manifestonin me gjallëri dhe me enthuziazëm të math, për këtë ditë.
N`orën 10 brohoritje dhe hurra të forta përshendesnin ardhjen e Gjeneral-Kolonel Enver Hoxhës, i cili shoqërohej nga anëtarë të Presidiumit të Kuvendit Popullor, anëtarë të Qeverisë dhe anëtarë të K.Q. të P.P.SH. Në tribunën qëndrore zunë vend: Gjeneral-Kolonel Enver Hoxha, Dr. Omer Nishani, Mehmet Shehu, Bedri Spahiu, Hysni Kapo, Beqir Balluku, Liri Belishova, Spiro Koleka dhe udhëheqës të tjerë të Shtetit dhe Partisë.
Nga trupi Diplomatik i akredituar në Tiranë ishin të pranishëm: i Dërguari i Jashtëzakonshëm dhe Fuqiplotë i B.R.S.S. Z.D. Tehuvahin, i Dërguari i Jashtzakonshëm dhe Ministër Fuqiplotë i Republikës Hungareze z. Lenard Szeri, i Ngarkuari me punë i R.P të Rumanisë z.N. Djamo, nënkonsulli Francez Z. Raimond Dermergue, sekretari i parë i legatës Sovjetike, z. A.Gagarinov, atasheu ushatark sovjetik, Kolonel Skalov dhe funksionarë të tjerë të legatave të mësipërme. Ishte i pranishëm gjithashtu delegati i Sindikatave Hungareze, Alfar Lazlo, i cili është ftuar për festën e 1 Majit.
Të shtëna artilerije lajmërojnë hapjen e parakalimit të 1 Majit. Shoku Spiro Pano, kandidat i K.Q. të P.P.SH. dhe Seketar politik i Komitetit të Partisë për Tiranën përshëndeti popullin e kryeqytetit.
