Sllovakët u janë drejtuar sot kutive të votimit për zgjedhjet e përgjithshme. Të dhënat paraprake flasin për një fitore të mundshme të kryeministrit aktual, Robert Fico.
Fushata e tij, e bazuar në gjuhën e ashpër kundër refugjatëve, e posaçërisht kundër muslimanëve, besohet se do të bëjë që partia e tij t’i fitojë sërish zgjedhjet.
“Ne kurrë nuk do të sjellim një musliman të vetëm në Sllovaki, nuk do të krijojmë një komunitet musliman këtu…,” ka thënë Fico ditë më herët në një miting në Bratislavë.
Sllovakia është shprehur kundër kuotave të shpërndarjes së emigrantëve, e vetë popullariteti i Fico-s në vend ka njohur rritje për shkak të qëndrimit të ashpër ndaj refugjatëve.
Partia e tij socialdemokrate, Smer-SD, ka aktualisht 83 vende në parlamentin me 150 anëtarë, por kjo shifër parashikohet të zbresë në 65-70 vende.
Qendrat e votimit janë hapur në Sllovaki në orën 07:00, për t’u mbyllur në 22:00. /tesheshi.com/
