Ka mjaftuar vetëm 10 orë reshje dhe kryeqyteti gjendet i bllokuar. Gjysma e Tiranës është në terr dhe pa furnizim me ujë. Ndërmarrja e Ujësjellësit thotë se nuk kemi ç’të bëjmë, se jemi pa drita, kurse operatorët e OSHE-së u sugjerojnë qytetarëve të blejnë soba gazi.
Dita e parë e reshjeve të dendura ka shkaktuar kaos në Tiranë. Gjysma e kryeqytetit është tërë paraditen pa energji elektrike, teksa defektet ende nuk janë rregulluar.
Qytetarët ankohen se operatorët e OSHE-së japin përgjigje arrogante. E tillë është dhe përgjigja e dhënë për një qytetar, siç tregon vetë ky i fundit. I pyetur për kohën e ardhjes së energjisë, punonjësi i shërbimit është përgjigjur çuditshëm, duke i ofruar si zgjidhje qytetarit blerjen e një sobe gazi!
Siç bëhet e ditur, defekte në rrjetin e transmetimit të energjisë elektrike ka në të gjithë zonën e kombinatit, të Kasharit, Yzberishit, Unazës së Re dhe Autostradës.
Operatori i Shpërndarjes së Energjisë Elektrike, thekson në një njoftim për shtyp se është duke e ndjekur me përparësi furnizimin me energji elektrike të të gjithë konsumatorëve nëpërmjet rrjetit shpërndarës të energjisë elektrike të 10 Drejtorive Rajonale.
Ndërkohë, si të mos mjaftonte e gjitha kjo, edhe ndërmarrja e Ujësjellës-Kanalizimeve ka njoftuar se stacioni i Qafëmollës ka mbetur pa energji për arsye të kushteve atmosferike, çka nënkupton furnizim shumë të kufizuar me ujë në thuajse më shumë se gjysmën e kryeqytetit. /tesheshi.com/
