Hidrocentralet e Ulzës dhe Shkopetit kanë hapur portat e shkarkimit, që prej mesdites të së shtunës për shkak të prurjeve të mëdha pas reshjeve të shiut. Nga këto HEC-e mësohet se është shkarkuar 800 m3/sek ujë, duke sjellë një rritje të ndjeshme të nivelit të lumit Mat. Për pasojë, ky lum ka dalë nga shtrati në disa vende në afërsi të Skurajve në Kurbin, duke përmbytyr disa sipërfaqe me tokë bujqësore.
E gjithë argjinatura e lumit po mbahet nën kontroll, kryesisht në zonën fushore të Lezhës, ku ka rrezik për përmbytjeje, por deri më tani nuk raportohet për problematika. Si pasojë e rrjedhës së fortë të lumit është vënë sërish në rrezik Rruga e Kombit, në afërsi të Skurjave të Kurbinit.
Uji i është afruar sërish trasese së rrugës në disa pjesë në një distancë prej 50 metrash duke e rrezikuar seriozisht atë. Kjo situatë e krijuar ka vënë në alarm autoritet në Lezhë të cilat kanë nisur marrjen e masave. Që prej orëve të para të mëngjesit të së dielës, në zonë pritet që të mbërrijnë forcat e ushtrisë dhe firma kontraktuese që mirëmban këtë segment rrugor.
Në këtë operacion do të përfshihen 30 mjete të tonazhit të rëndë të cilët do të hedhin gurë dhe inerte për të shmangur rrezikun që po i kanoset këtij aksi rrugor. Situata është monitoruar gjatë gjithë pasdites nga Sekretari i Përgjithshem i Prefektures së Lezhës, Altin Jaku dhe shefi i emergjencave, Ndrek Mhillaj. Ata kanë bërë të ditur se gjatë orëve të pasdites ka një rënie të nivelit të shkarkimeve nga HEC-et, çka do të sjellë edhe rënie të prurjeve në lumin Mat. /tesheshi.com/
