Çfarë është “Republika e Re” që lindi në çadër dhe pse PD po rrëshket në populizim në mungesë të një programi politik?!
Më 18 shkurt opozita protestoi dhe ngriti një çadër në bulevard duke kërkuar zgjedhje të lira dhe një qeveri teknike që i garanton ato. Që nga 18 shkurti diskursi politik ka ndryshuar herë pas herë; nga i dhunshëm me “shponi gomat, digjni, luftë do të kenë” deri tek premtimi i një “Republike të re”. Duket se ky togfjalëshi i shpikur në mesin e rrugës ngjit më shumë ndaj e kthyen në një slogan politik…por akoma nuk e kanë kthyer në një projekt politik.
“Ne do të shembim republikën e vjetër e do të ngremë republikën e re”, thotë kreu i partisë Demokratike Lulzim Basha prej disa javësh, por pa shpjeguar se çfarë projekti është “Republika e Re” e tij. Droga dhe kriminelët janë simboli i republikës aktuale sipas tij, por çfarë është ajo e reja që ai premton askush nuk e di. Këtë u ka lënë në dorë njerëzve që ta krijojnë.
PD ka krijuar një faqe në internet ku u kërkon qytetarëve që çojnë propozimet e tyre për republikën e re. Prezantimi që i bëhet konceptit në faqen zyrtare është ky: “Republika e re që po lind është në zemrat e gjithsecilit prej nesh. Republika e re është republika e standardeve europiane dhe amerikane që shqiptarët kaq shumë e duan dhe kaq shumë e ëndërrojnë”.
A po shkon Basha drejt idesë së Artan Fugës për Republikën e re ku “Kushtetuta që kemi të hidhet në kosh”? Apo është frymëzuar nga “Lufta e Yjeve” ku republika e re është qeverisja imagjinare e galaktikës nga “forcat rebele”, revolucioni ndër-ujor në filmin fantashkencor të Hollivudit.
Republika e re apo republika popullore
Politologët e shohin këtë diskurs të Bashës si shkarje në populizëm; pushteti i popullit, vendimmarrja e popullit. Ndërsa historia ka treguar se “republikat e reja” kanë ardhur ose me revolucione (Francë) ose pas një lufte civile (SHBA).
Pra nuk ka një sens logjik të republikës së re në Shqipërinë e vitit 2017 në një sistem demokratik, ku amerikanët dhe europianët (në standardet e të cilëve do të bëjë Basha Republikën e re) po i kërkojnë atij të kthehet në Parlament dhe të respektojë institucionet e republikës që kemi në fuqi.
Pra, kjo republika e re që kërkon kreu i opozitës shqiptare sot nuk është një ofertë politike për elektoratin në prag të zgjedhjeve; nuk është një projekt për shembjen e sistemit që njohim dhe ngritjen e një të riu; është slogan politik që synon të shtrojë parabolën: morali i popullit kundër klasës politike. Pa kuptim dhe e pamundur, pasi në një demokraci liberale populli është i përfaqësuar në organet vendimarrëse, qeveria, parlamenti, ku vendimet merren nga politikbërësit.
Po le ta kuptojmë “Republikën e re” të Bashës më shumë si një slogan politik, si një mënyrë për të ngritur një “PD të re” ose një “Rilindje” si ajo e Edi Ramës me PS-në. Duke parë dhe videon promovuese të “Republikës së re” ku ka vetëm fytyra të panjohura të rinjsh; çadrën e protestës ku mund të flasë gjithkush që ka dëshirë; duket më shumë si një përpjekje për të pastruar PD-në nga garda e vjetër e republikës së vjetër që ata përfaqësojnë se sa një projekt politik real me të cilin ai mund të dalë në fushatë dhe të kërkojë vota. “Republika e re” është një term shumë ekstremist për t’u kthyer një një projekt real, i duhet një “Le Pen” për ta mbrojtur. /tesheshi.com/
