Mediat serbe vijojnë të promovojnë turizmin shqiptar, kjo falë shtetasve të shumtë të tyre që tej çdo paragjykimi nacionalist janë dyndur bregdetit tonë, për të shijuar mirë dhe lirë plazhet mahnitëse, sidomos ato të Jonit. Së fundi është Telegrafi serb që i ka kushtuar një reportazh Shqipërisë, resuresve të saj turistike, ku veç aspekteve pozitive ka renditur dhe ca negative, që gjithsesi qëndrojnë…(shën.re.)
“Po shkon për pushime në bregdetin shqiptar?”, është reagimi i parë që do të dëgjoni nga njerëzit tanë kur u tregoni atyre se keni vendosur që të shkoni atje për pushime verore. Paragjykimet ndaj Shqipërisë zhduken sapo u tregoni fotot e bregdetit të tyre dhe çfarë është shërbimi atje. Vendi shqiponjave në vitet e fundit po evoluon me shpejtësi, dhe turistë tanë që vizitojnë këtë bregdet ka çdo vit e më shumë.
Vitin e kaluar Shqipëria ka inkasuar nga turizmi më shumë se 1.16 miliardë euro, ose 15 për qind më shumë se në të njëjtën periudhë të vitit të kaluar. Të ardhurat në tremujorin e tretë, nga korriku në shtator, në kulmin e sezonit turistik, kanë arritur në 521 milionë euro, që i bie 25 për qind më shumë se në të njëjtën periudhë të vitit të kaluar.
Vendi i 3 milionë banorëve shtrihet në brigjet e dy deteve, Adriatik dhe Jon. Trashëgimia kulturore është e pasur, dhe gjithnjë e më shumë po i kushtohet rëndësi turizmit dimëror, vizitave në vendet fetare dhe historike.
Një nga gjërat që e bën Shqipërinë një destinacion tërheqës është fakti se është larg nga vendet e Europës një deri tre orë fluturim, duke ofruar një shumëllojshmëri të mundësive për një pushim cilësor. Është relativisht afër për turistët tanë, kurse duke iu falenderuar autostradës së shkëlqyeshme të ndërtuar në vitin 2006, atë që lidh Shqipërinë dhe Kosovën, do të udhëtoni më shpejtë dhe më rehatshëm se në vendet e tjera fqinje.
Çmimet
Valutë zyrtare në Shqipëri është leku (1 euro = 132 lekë), edhe pse pranojnë euro në të gjitha dyqanet, baret dhe restorantet.
Mesatarisht, për një pushim prej shtatë ditësh për dy persona në Sarandë, Shqipëri të jugut, përballë ishullit të Korfuzit, mund të ndani për të shpenzuar rreth 350 euro, duke përfshirë transportin, akomodimin dhe ushqimin.
Të dhëna të ngjashme vlejnë dhe për Durrësin, i cili ndodhet pak kilometra nga kryeqyteti, Tirana. Në të, një familje mesatare me një fëmijë, në një hotel shumë të mirë, mund të kalojë pushimin për 330 euro për pesë ditë, me mëngjes. Hotelet janë kryesisht të reja dhe objekte tjera janë duke u ndërtuar.
Sipas agjencive të udhëtimit nga Bujanoci dhe Presheva, turistët nga Serbia kanë treguar interesim më të madh për pushime në Durrës.
Çmimet e ushqimeve janë të kapshme. Në hotel mund të hani për 5-8 euro për person. Në restorantet përreth, çmimet janë më të ulëta. Për shembull, çmimi për një kafe në plazh është rreth 80 lekë ose rreth 72 dinarë, supa është 250 lekë (rreth 225 dinarë), dhe pjata kryesore mund të kushtojë afër 750 lekë ose 675 dinarë.
Çmimet e ushqimeve në supermarkete janë të favorshme. Kështu një kola në kanaqe mund të kushtojë rreth 60 deri 100 lekë (54-90 RSD), ujë në shishe 1.5 litra 50 lekë (45 dinarë), buka 60 lekë (54 dinarë) … Meqë bëhet fjalë për bregdet, çmimet janë më se të përballueshme. Kështu është edhe me produkte të tjera.
Për një litër naftë paguani, mesatarisht, rreth 185 lekë (1.33 euro).
Udhëtimi dhe akomodimi
Rrugët shqiptare janë të reja, por ato janë shpesh të pashënuara, prandaj është e domosdoshme që të udhëtoni me kujdes, sidomos duhet të keni kujdes nga shoferët shqiptarë, të cilët, linja e plotë, automjetet nga drejtimi i kundërt dhe kufizimet e tjera nuk i ndalojnë nga parakalimi dhe ngarja me shpejtësi të tepruar.
Në qytete fitoni përshtypjen se në çdo moment dikush do të hidhet në automjetin tuaj. Çiklistët, këmbësorët, të gjithë shkojnë rrugës së tyre, kurse në disa qytete, si Shkodra, duhet të keni durim të madh për të ecur. Sinjalizimi është i dobët. Drita të veturave të thyera, dritat e trafikut dhe kalimet për këmbësorë ekzistojnë, por në përgjithësi nuk përdoren.
Nga ana tjetër, janë ndërtuar më shumë se 100 kilometra të autostradës, prandaj shumë shpejt ju mund të arrini në Durrës dhe Vlorë. Pasi që shenjat e trafikut në qytete janë shumë të varfra, as mos t’ju shkojë në mendje të ecni pa sistem navigimit.
Duhet pasur veçanërisht kujdes gjatë ecjes në rrethrrotullime që nuk janë shënuar, ngase në to gjithashtu lëvizin këmbësorët, çiklistët, mjetet motorike, pra, qerret dhe të gjithë pjesëmarrësit të tjera të mundshme në trafik.
Plazhet me rërë
Në Sarandë, e cila ka dalje në detin Jon, ka dy plazhe publike, por për shkak të afërsisë së portit nuk ka mundësi të shijimit të notit dhe pushimit, dhe për këtë arsye nuk shihen shumë njerëz në të. Megjithatë, në afërsi gjenden disa perla të vogla të bukura turistike me plazhe ranore, si Ksamili, Manastiri, Himara…
Borshi, me një gjatësi prej më shumë se pesë kilometra, me krenari mban titullin e plazhit më të gjatë në detin Jon, dhe e quajnë “perla e Shqipërisë se jugut.”
Bunkerët e Hoxhës
40 vjet më parë, diktatori komunist Enver Hoxha urdhëroi ndërtimin e më shumë se 750,000 bunkerëve në të gjithë Shqipërinë. Pas rënies së regjimit komunist, bunkerët e braktisur në bregdetin e Adriatikut përsëri po kthehen në funksion. Këtë herë, këto nuk janë të destinuara për të mbajtur të huajt larg nga brigjet shqiptare, por për t’i tërhequr ata.
Duke udhëtuar nëpër këtë vend ju mund të hasni në shumë objekte kulti. Në mesin e tyre janë të vendosur më shumë që 250 kisha ortodokse dhe shumë manastire.
Përgatiti: Jeton Zenuni – /tesheshi.com/
Për më tepër ndiqni videon:
