Fshatrat e komunës së Podujevës në brezin kufitar me Serbinë, po boshatisen. Banorët po ikin për arsye të ndryshme. Por më kryesorja del të jetë martesa. Në një fshat ka mbetur vetëm një familje, por dhe ajo po bëhet gati të ikë në qytet. Arsyeja është se askush nuk po u jep nuse për djalin!
Nga Zekirja Shabani
Kanë mbetur e vetmja familje në Rakinicë, fshatin më të thellë të Komunës së Podujevës në brezin kufitar me Serbinë. Të gjithë fqinjët u kanë ikur. Edhe H.Z po planifikon që në pranverë të zhvendoset në qytet. “Në shëngjergj i mbushë 34 vjet. E askush nuse s`po i jep”, ofshanë H.Z, nga Rakinica, derisa tregon për fatin e djalit të tij të vetëm që i ka mbetur pa martuar.
Për këtë arsye, fshatin e kanë lënë edhe të tjerët. Martesa e të rinjve në këtë zonë është e vështirë, pavarësisht kushteve të mira ekonomike dhe infrastrukturës rrugore.“Ka shumë djem të rinj që është dashur të blejnë tokë në rrafsh për me mujt me u martu”, tregon ai.
Nga frika se edhe pasi të zhvendoset mund të ketë telashe të ngjashme, djali i H.Z, nuk dëshiron të identifikohet. Ndërkaq, i ati i tij flet me mburrje për aftësinë e të birit si blegtor. Por kjo duket se nuk mjafton që ta mbajë atë në këtë zonë, larg jetës së qytetëruar të cilën e kërkojnë vajzat si kusht për t`u bërë nuse e kësaj familje.
Kështu, dalëngadalë 24 fshatra në 94 kilometra brez kufitar me Serbinë, po zbrazen. Kordinatori i Komitetit të fshatrave i Komunës së Podujevës, Latif Mehmeti, tregon se zbrazja e fshatrave të kësaj komune ka filluar që në vitet e 90’ta dhe po vazhdon.
Një kohë, ai thotë se kushtet ekonomike kanë ndikuar që banorët të kërkojnë jetë më të mirë. “Është pastaj nevoja për shkollim e zhvillim të karrierës që i ka shtyrë shumë njerëz të braktisin vendin e tyre”, thotë Mehmeti. Përveç kësaj, edhe çështja e sigurisë është faktor që ka ndikuar tek banorët.
Për arsye sigurie, shpesh banorët e kësaj ane frikësohen të flenë rehat. Banorët kërkojnë që autoritetet vendore dhe ato ndërkombëtare si KFOR-i, EULEX-i, dhe Policia e Kosovës, duhet të bëjnë më shumë për sigurinë e qytetarëve që jetojnë në afërsi të vijës kufitare ndërmjet Kosovës dhe Serbisë. Vitin e kaluar, shpesh xhandarmëria serbe është futur thellë në territorin e Kosovës, ndërsa në një rast ka arrestuar edhe polic të Kosovës në detyrë.
Më tragjike është vrasja e një banori të brezit kufitar, derisa ai po barte dru për djegie. Gjithashtu, vitin që shkoj, pesë kosovarë, janë plagosur në fshatin Mirofc të Podujevës, në brezin kufitar në mes të Kosovës dhe Serbisë. Siç bëhet e ditur, atje ka pasur shkëmbim zjarri me përfaqësuesit e xhandarmërisë serbe dhe shqiptarëve, të cilët thuhet se kanë qenë duke prerë drunj ilegalisht.
“Cilado qoftë arsyeja, banorët po ikin nga brezi kufitar. Kjo nuk është shenjë e mirë”, thotë Mehmeti. Ai përmend fshatin Tërnavicë, që tani ka vetëm dy familje ndërsa dikur numëronte 99 sosh. Gjithashtu edhe Murgulla, me sipërfaqe 26 kilometra numëron vetëm 13 familje, ndërsa në gjendje më të rëndë janë Përpellaci e Recica që kanë mbetur thuajse bosh. “Edhe shkollat është detyruar komuna ti mbyllë, pasi nuk ka nxënës.
Situatë hiç më e mirë nuk është as në Karaqevë. Të shqetësuar shprehen qytetarët, po ashtu edhe në pjesë të Gjilanit në Muçibabë edhe fshatrat e tjera të cilat gravitojnë në kufij dhe ka në vazhdimësi reagime të cilat tregojnë se nuk ka siguri të mjaftueshme./TeSheshi/
