Thaçi ka akuzuar partitë opozitare se po përpiqen ta marrin pushtetin me dhunë.
Përmes një shkrimi të publikuar në Facebook, Thaçi ka thënë se irritimi i opozitës në Kosovë është në rritje, sidomos pas vendimit të Gjykatës Kushtetuese, e cila – sipas tij, – ka qartësuar se Asociacioni i komunave me shumicë serbe do të themelohet në përputhje me Kushtetutën dhe ka saktësuar mënyrën e themelimit dhe dispozitat kushtetuese, të cilat duhet t’i përmbajë statuti, nëpërmjet të cilit themelohet dhe funksionon Asociacioni.
Menjëherë pas këtyre deklaratave të zv.kryeministrit Thaçi, ka reaguar kryetari i Vetëvendosjes, Visar Ymeri.
“Zëvendëskryeministri, që mezi pret të bëhet President, sot ka shkruar një hartim, ku si zakonisht kërcënon opozitën. Hashim Thaçi, i cili kritikon opozitën se gjoja po vepron ‘për pushtet’, harron që vet ai ‘u nominua’ për president në të njëjtën mënyrë si personazhet e ‘Big Brother’-it, pasi nënshkroi një marrëveshje të fëlliqur të ndarjes së pushtetit me aleatët e tij, Isa Mustafën dhe Listën Srpska, me të cilët krijoi qeverinë e Rashkës. Për pushtetin e Presidentit, pra për post e për pozitë, ai themeloi një qeveri në Kosovë që ka punuar vetëm për Serbinë, e kundër Kosovës si republikë e qytetarëve të saj”, thuhet në reagimin e Ymerit, të shpërndarë me postë elektronike nga Lëvizja Vetëvendosje. /tesheshi.com/
