Presidenti meksikan, Enrique Pena Nieto e krahasoi retorikën e kandidatit presidencial republikan, Donald Trump me atë të liderit naziste, Adolf Hitler.
Në një intervistë me të përditshmen meksikane, Excelsior, ai e cilësoi retorikën e Trump si “gërricëse”, duke shtuar: “kështu erdhi Musolini, kështu erdhi Hitleri”.
Sipas presidentit meksikan, Trump ka dëmtuar marrëdhëniet mes Shteteve të Bashkuara dhe Meksikës.
Donald Trump ka deklaruar se nëse zgjidhet president, ai do të ndërtojë një mur përgjatë kufirit të Shteteve të Bashkuara me Meksikën për të ndaluar emigrantët të kalojnë në mënyrë të paligjshme në territorin amerikan.
Kandidati republikan, gjithashtu ka këmbëngulur se Meksika do të paguajë për murin kufitar, gjë që presidenti Pena Nieto e ka hedhur poshtë pa hezitim. Ai tha se nuk ka “asnjë skenar” sipas të cilit Meksika do të paguante ndonjëherë për një mur të tillë.
Trump, i cili e ka bërë luftën ndaj emigracionit të paligjshëm hallkën kryesore të fushatës së tij, zemëroi meksikanët qershorin e kaluar ndërsa i cilësoi emigrantët e paligjshëm si “kriminelë” dhe “përdhunues”.
Presidenti Pena Nieto theksoi se Trump ofron “zgjidhje shumë të lehta e të thjeshta për probleme që dukshëm nuk janë kaq të thjeshta për t’u zgjidhur”.
“Ka pasur episode në historinë njerëzore, për fat të keq, kur shprehje të tilla të retorikës nxitëse kanë sjellë vetëm situate fatkeqe në historinë e njerëzimit”, tha ai.
“Kështu erdhi Musolini, kështu edhe Hitleri, ata përfituan nga një situatë e caktuar, ndoshta një problem, përmes të cilit po kalonte njerëzimi në atë kohë, pas një krizë ekonomike”, shtoi ai.
Deri më tani, presidenti meksikan, Pena Nieto i kishte shmangur komentet mbi kandidaturën e Trump, duke këmbëngulur se ai do të kishte “absolutisht respekt” për procesin politik në Shtetet e Bashkuara.
Paraardhësi i tij në detyrë, ndërkaq, ka folur fare hapur.
Ish-presidenti Vicente Fox përdori një pasthirrmë në një intervistë live në televizion kur tha se Meksika nuk do të paguante për murin e propozuar nga Trump.
Felipe Calderon, që qeverisi Meksikën në vitet 2006-2012, gjithashtu e ka hedhur poshtë një ide të tillë duke iu drejtuar meksikanëve: “Popull meksikan, ne nuk do të paguajmë as edhe një cent të vetëm për një mur të tillë idiot”. Përgatiti: Juli Prifti – /tesheshi.com/
