Për herë të parë pas një viti, në Europë një politikan bën politikë për të fituar zgjedhjet duke iu kundërvënë fort Donald Trump-it.
Ky është Matteo Renzi, kreu i Partisë Demokratike italiane, i cili në dy fjalime të mbajtur sot e ka cilësuar presidentin e SHBA si “mjeshtrin e frikës”.
Renzi është marrë gjatë me propozimin e presidentit amerikan që disa mësues të shkollave të pajisen me armë, që të gjuajnë menjëherë nëse do të ketë sulmues që tentojnë të vrasin njerëz.
“Një propozim i tmerrshëm, jashtë çdo logjike njerëzore. Mësuesve duhet t’u japim libra dhe ambiente të denja shkollore dhe jo kotecë.
E shikoni ç’ndodh kur bëhet politikë me frikën?
Edhe te ne ka politikanë që bëjnë të njëjtën gjë, duke dalë si modeli i trumpizmit.
Po s’i mundemi ta çojmë nëpër mendje se mund të pajisim mësuesit me pushkë?
Si mundemi të shikojmë dhunën si zgjidhje ndaj dhunës?
Ne mund të na duket larg ky debat, pasi është shumë amerikan. Dhe fatmirësisht është i tillë për shumë aspekte.
Por kur politika kultivon frikërat, vë bast mbi të, duket gati i natyrshëm propozimi që t’i japë një pistoletë profesorëve.
Le të kthehemi në njerëz miq të dashur. Të rikthejmë vlerat që na kanë bërë të mëdhenj. Të kujtohemi kush jemi.
Meseleja e Trump që thotë se fitohen zgjedhjet duke luajtur me frikën do të na bëjë që të ndjekim gjithmonë fantazmat.
Ne duam të angazhohemi për ëndrrat jo mbi makthet që na shqetësojnë në gjumë; mbi realitetin dhe jo për fantazmat; mbi kurajon dhe jo mbi frikën”.
Kështu deklaroi kandidati për kryeministër i Italisë, i cili në sondazhet jepet si partia e tretë në garë, por ai insiston se do të dalë grupi i parë parlamentar.
Dhe ka arritur të jetë protagonist duke i bërë dy rivalët e tij direkt, Luigji di Maio-n e 5 Yjeve dhe Matteo Salvinin e Lega Nord që t’ i shmangen debateve televizive me të.
Por sot kreu i PD-së italiane në fakt ka bërë atë që edhe Angela Merkel nuk iu afrua në fushatë, të sulmonte direkt presidentin e SHBA-së, duke u radhitur si një kundërfigurë politike e trumpizmit.
Por Renzi që është një politikan shumë i fiksuar me sondazhet dhe imazhin publik, sipas të gjitha gjasave e ka bërë këtë lëvizje për të marrë më shumë vota të së majtës “së thellë”.
Në zgjedhjet e 4 marsit ai garon i veçuar në një forcë politike që drejtohet nga dy figura të së majtës, kreu i Senatit, prokurori i njohur antimafia, Pietro Grasso dhe kryetarja e Dhomës së Përfaqësuesve, Laura Boldrini.
Kandidatë për deputetë të partisë “Të drejtë dhe Barabartë” është edhe Massimo D’Alema, ish-kryeministër i së majtës dhe pasardhësi i Renzi-t, Pierluigi Bersani.
Nëse e krahasojmë fushatën e imazht të Renzi-t, ngjan mjaft me atë të Edi Ramës në zgjedhjet e vitit 2013.
Për shembull spoti i PD-së italiane ka thuajse të njëjtë detajin e makinës, ku tek ne Edi Rama del me bllokun e policit, kurse në Itali, një personi që nuk do të votojë PD-në, i afrohet Renzi mbi biçikletë që e bind. /tesheshi.com/
