Nga Blendi Gashi
Koalicioni qeverisës PDK-LDK duhet të dorëhiqet menjëherë dhe vendi të shkojë në zgjedhje të reja. Kjo është kryefjala e deklarimeve të opozitës së bashkuar, disa ish-deputetëve dhe analistëve në vend, pas aktgjykimit të Gjykatës Kushtetuese se Asociacioni i Komunave me shumicë serbe nuk është tërësisht në përputhshmëri me frymën e Kushtetutës, me nenin 3 të saj dhe me të drejtat e komuniteteve në Kushtetutën e Kosovës.
“Kundër argumenteve tona Isa Mustafa dhe Hashim Thaçi patën deklaruar se Zajednica është OJQ, është në përputhje me ligjet dhe Kushtetutën dhe se Dekretin për themelimin e saj do ta dërgonin në Gjykatën Kushtetuese. Prandaj largimi i menjëhershëm i Mustafës dhe Thaçi është i domosdoshëm dhe më e pakta që duhet të ndodhë”, ka deklaruar opozita e bashkuar.
Analisti Arben Qirezi, aktgjykimin e Kushtetueses e quan një kompromis, sepse thotë se megjithatë lejon zbatimin e marrëveshjes për Asociacionin në pikat që nuk janë në shpërputhje me Kushtetutën, dhe shton se sipas parimit ligjor, marrëveshja do të duhej të binte në tërësi.
Qirezi ka deklaruar për tesheshi.com se pas këtij aktgjykimi duhet të pasohet me dorëheqjen e qeverisë dhe të shpallen e zgjedhjeve të reja, pasi ekzekutivi nënshkroi marrëveshje anti-kushtetuese të cilën e mbrojti me dhunë të paparë kundër opozitës.
“Ky vendim nuk i ka lënë asnjë pikë legjitimiteti kësaj qeverie dhe është në të mirë të Kosovës që ajo të dorëhiqet sa më parë dhe të mbahen zgjedhjet e parakohshme”, thotë Qirezi.
Njohësi i rrethanave politike, Nexhmedin Spahiu thotë se pas aktgjykimit se ‘Zajednica’ është kundërkushtetuese, duhet të pasojnë dorëheqjet dhe të japin përgjegjësi urdhërdhënësit që çuan deputetët opozitarë në burg.
“Tani që Zajednica doli antikushtetuese, kryeministri i Kosovës duhet të jap dorëheqje për tentim dhunimi të Kushtetutes. Prokurorët dhe gjykatësit që dënuan deputetët që mbrojtën Kushtetutën e Kosovës duhet të turpërohen”, ka deklaruar Spahiu për tesheshi.com.
Edhe ish-deputetja e AKR-së Myzejene Selmani në një prononcim dhënë për tesheshi.com, thotë se dikush duhet të dorëhiqet për nënshkrimin e dhënë në Bruksel për formimin e Asociacionit.
“Gjithë tmerri i krijuar dhe kriza politike morale, degradim i Kuvendit dhe Qeverisë, dërgon në dorëheqjen e pashmangshme të qeverisë”, ka pohuar Selmani.
Ish-deputeti Naim Maloku, thotë se vendimi i Gjykatës Kushtetuese e arsyetoi gazin lotësjelles në Kuvend, sepse pozita nuk la mundësi apo rrugë tjetër dhe i dha udhë për dorëheqje qeverisë.
“Prej sot Kosova edhe de jure udhëheqet nga një qeveri jo legjitime”, thotë Maloku.
/tesheshi.com/
