Është zbuluar se rrëzimi i një aeroplani mbi Detin Mesdhe, ku humbën jetën 66 persona, ngjarje e ndodhur në 2016-ën, është shkaktuar nga një pilot i cili po pinte një cigare në kabinë.
Fjala është për fluturimin MS804 i EgyptAir, nga Franca në Egjipt në maj 2016. Airbus A320 u rrëzua në det në jug të ishullit grek të Kretës, duke vrarë të gjithë pasagjerët, mes tyre 12 turistë francezë, një britanik, 30 egjiptianë, dy irakianë dhe një kanadez.
Autoritetet egjiptiane në atë kohë pretenduan se avioni u rrëzua nga një sulm terrorist -megjithëse asnjë grup terrorist nuk e ka marrë ndonjëherë përgjegjësinë për sulmin.
Por një hetim zyrtar doli në përfundimin se aksidenti ishte shkaktuar nga tymosja e një cigareje në kabinë, e cila ndezi oksigjenin që rridhte nga maska e urgjencës.
Pilotët egjiptianë pinin duhan gjithsesi në kabinë dhe nuk ishte i ndaluar në momentin e përplasjes në vitin 2016, sipas një raporti 134 faqesh të hartuar nga ekspertë të.
Për arsye të pashpjeguara, inxhinieri i mirëmbajtjes së avionit ndryshoi cilësimin e maskës së oksigjenit nga normale në emergjente, duke shkaktuar rrjedhje të oksigjenit.
Më 19 maj, rreth orës 2:25 të mëngjesit, minuta përpara se avioni të rrëzohej në det, hetuesit e aksidentit identifikuan një zhurmë fërshëllimë të shkaktuar nga një rrjedhje oksigjeni nga maska. Pilotët e aeroplanit duhet të kishin vënë re para se të ngrihej se maska nuk ishte e saktë, tha një pilot me përvojë.
“Pas hyrjes në kabinë, një nga kontrollet e ndryshme që bëjmë përpara ngritjes është të kontrollojmë rrjedhën e oksigjenit në maska”, tha për Corriere della Sera Daniele Veronelli, një pilot i Airbus A320 dhe një anëtar i Shoqatës Kombëtare të Pilotëve Italianë.
“Nëse çelësi është në pozicionin normal, oksigjeni rrjedh sipas kërkesës. Nëse është në pozicionin e urgjencës, oksigjeni do të dalë nën më shumë presion për të larguar tymin që mund të jetë në kabinë nëse ka zjarr.”
Raporti nuk është bërë ende publik, sipas Corriere della Sera.
Julie Heslowin, e cila humbi vëllain 41-vjeçar dhe babain 75-vjeçar, tha: “Ne kemi pritur që nga viti 2016 për të zbuluar pse kemi humbur të dashurit tanë dhe zyrtarisht askush nuk na ka thënë asgjë. /tesheshi.com/
