Nga Blendi Gashi
Kadri Veseli me hov të madh dhe shumë entuziasëm ende pa rënë qeveria “Mustafa” e nisi turin e dëgjimit me qytetarë dhe ekspertë për të dëgjuar nga ta problemet me të cilat ballafaqohet vendi, dhe më vonë “Fillimin e Ri”, për të marrë pozitën e kryeministrit për çka edhe e çojë vendin në zgjedhje.
Por pas shpalljeve të zgjedhjeve ende pa hyrë në garë Veseli papritmas u dorëzua duke bërë koalicion parazgjedhor me AAK-në dhe NISMA-n dhe mbështeti Ramush Haradinaj për kryeministër.
Kjo ishte disfata e parë e kreut të PDK-së. E dyta erdhi pas zgjedhjeve, ku partia e tij mori rezultate tejet zhgënyese pasi humbi plot 14 deputet, nga 35 sa kishte në zgjedhjet e 2014-tës, ra si parti në 21 deputet në zgjedhjet e 2017-tës, edhe pse si koalicion dolën fitues.
Humbja e kaq shumë deputetëve sikur ka lën të shtangur krerët e PDK-së, ku një javë pas zgjedhjeve as Veseli dhe asnjë prej udhëheqësve tjerë të lartë nuk po flasin pse pësuan një humbje kaq drastike dhe nëse do bëhen reforma nga Kryesia e Këshilli i Përgjithshëm, deri te degët e nëndegët në mbarë vendin, por në paraqitje mediale nënkryetarët e kësaj partie rezultatet e 11 qershorit janë munduar t’i shesin si fitore.
Portali tesheshi.com ka tentuar gjatë gjithë ditës së hënë të kontaktojë me drejtuesit e lartë të PDK-së, si Hajredin Kuçin, Xhavit Halitin, Adem Grabovcin, Agim Çekun, Shaip Mujën, Blerand Stavilecin, por për dallim nga Grabovci që nuk është përgjigjur të tjerëve u ka dalë telefoni i fikur.
Për temën në fjalë nuk ka dashur të flasë as ish-deputeti Fatmir Shurdhaj i cili pasi ka hapur telefonin dhe i është parashtruar pyetja: si e shihni humbjen e 14 deputetëve krahasuar me zgjedhjet e 2014-tës, dhe a duhet të ketë refoma të thella në pari, ai ka thënë shkurt “jam në Tiranë nuk mund të flasë. Kur të kthehem në Kosovë bisedojmë”.
Buja: Duhet reformim…
I vetmi që ka pranuar të flas për rezultatet e PDK-së nga të kontaktuarit e tesheshi.com është ish deputeti Shukri Buja.
“Si koalicion jemi fitues, po llogaritjet politike para zgjedhjeve ishin të dobëta dhe mund t’i quaj të dëmshme sepse lista në përbërje 50 me 50 e ka dëmtuar rëndë PDK-në si subjekti më i fuqishëm në këtë koalicion. Mospërfshirja e 55 emrave të personaliteteve të PDK-së i ka kushtuar subjektit tonë në mos më shumë me 55.000 vota minus!? Se a duhet reformim, sigurisht para veprimeve duhet analizë e gabimeve e lëshimeve që bëmë për të ardhur në përfundime të nevojshme për hapat që duhet ndërrmarrë. Kemi shumë pak kohë për reflektim pasi zgjedhjet e afërta lokale janë një sprovë e rëndë për ne”, ka thënë Buja.
Kujtojmë se sipas rezultateve preliminare PDK ka vetëm 21 deputetë, AAK 10 e NISMA 8. Pra të tre partitë si koalicion fitues kanë 39 deputetë.
Ndryshe PDK është në pushtet prej vitit 2007 kur pati dalë partia e parë, duke marrë udhëheqjen e qeverisë. Edhe në dy palë zgjedhje tjera pati dalë fituese, porse në mandatin e fundit pozitën e kryeministrit ia dha kreut të LDK-së Isa Mustafa./tesheshi.com/
