Me kalimin e orëve rritet edhe bilanci i viktimave në tragjedinë e Ankarasë.
Në orët e mesditës numri i të vrarëve është rritur në 86 vetë dhe i të plagosurve në 186. Kështu bën të ditur ministria e Shëndetësisë në një deklaratë për shtyp.
Sot në mëngjes rreth orës 10.00, sipas orës lokale,(11.00 me orën e Tiranës) në kryqëzimin e stacionit historik të trenit në kryeqytetin e Turqisë, Ankara, kanë ndodhur dy shpërthime të njëpasnjëshme.
Në ngjarje kanë humbur jetën 86 (62 në vendngjarje dhe 24 në spital) dhe janë plagosur mbi 186 të tjerë, ndërkohë që 28 prej të plagosurve janë në gjendje të rëndë.
Të plagosurit u transferuan në spitalet “Numune”, İbni Sina” dhe spitalet e tjera përreth.
Shpërthimet kanë shkaktuar dëme të mëdha materiale në stacionin historik të trenit në kryeqytetin e Turqisë.
Shpërthimi ndodhi në pikënisjen e mitingut për “Paqe dhe Demokraci”, një tubim i planifikuar për t’u organizuar sot paradite në Ankara.
Dyshohet për një sulm kamikaz. Ka shqetësime për rritjen e numrit të të vdekurve dhe plagosurve.
Menjëherë pas ngjarjes Kryeministri Ahmet Davutoglu mori informacione nga Ministri i Punëve të Brendshme Selami Altinok dhe Ministri i Shëndetësisë Mehmet Myezinoglu.
Davutoglu thirri në rezidencën e Kryeministri për një mbledhje Zv.kryeministrin Yalçın Akdogan, autoritetet nga Ministria e Punëve të Brendshme dhe asaj të Shëndetësisë, Shefin e Shërbimit Informativ (MIT) Hakan Fidan, Drejtorin e Përgjithshëm të Policisë Lekesiz si dhe Prefekti i Ankarasë Kılıçlar.
Për shkak të shpërthimeve edhe Presidenti Erdogan ka anuluar programin e planifikuar për sot.
Lideri i Partisë CHP, Kemal Kılıçdaroglu në daljen e parë publike pas sulmit deklaroi se edhe ai ka anuluar të gjithë programin e parashikuar për ditën e sotme.
/tesheshi.com/
