Pavarësisht se nuk mundi të kualifikohet për në Botërorin e Rusisë, Kombëtarja shqiptare e futbollit qëndron më lart në klasifikim se organizatorët e këtij evenimenti.
Sipas renditjes së fundit të FIFA-s që i përket ditës së enjte, Shqipëria është ngjitur me 9 vende në klasifikimin e skuadrave, duke u pozicionuar në vendin e 62-të.
Në këtë mënyrë, përfaqësuesja kuq e zi e ka gjetur veten 3 vende më lart sesa Rusia, apo edhe 1 vend më lart se një tjetër vend pjesmarrës në Botërorin e vitit të ardhshëm, siç është Arabia Saudite.
Në këtë renditje, natyrisht që ka ndikuar jo pak fitorja e Shqipërisë në miqësoren e luajtur në Turqi ndaj vendasve, ndeshje e mbyllur me rezultatin 2-3.
Ndërkohë përmirësim në renditje ka patur edhe për Kombëtaren e Kosovës, e cila në klasifikimin e FIFA-s është ngjitur edhe ajo me 9 vende, duke u pozicionuar e 174-ta. /tesheshi.com/
