Partia Demokratike ka publikuar pamje me anë të së cilave denoncohen parcelat e mbjella me kanabis, në Vlorë konkretisht dhe në të gjithë Shqipërinë. Por sipas Ministrisë së Rendit, pamjet e transmetuara janë ato të Policisë së Shtetit. Sipas kësaj ministrie, ato janë njëherësh dhe një provë se si kjo qeveri po e lufton kultivimin e drogës.
Ja çfarë thuhet në deklaratën e saj:
Policia e Shtetit falënderon subjektin politik që me deklaratat dhe pamjet e shfaqura sot u bën jehonë aksioneve të Policisë së Shtetit dhe luftës së pandërprerë kundër kultivimit të narkotikëve.
Pamjet që u transmetuan sot nga PD janë filmuar nga vetë Policia e Shtetit si pjesë e punës intensive për dosjen hetimore përkatëse.
Bazuar mbi këto hetime (përfshirë edhe pamjet) u zhvillua aksioni për asgjësimin e këtyre bimëve narkotike dhe vënien para përgjegjësisë ligjore të autorëve të shkeljes së ligjit.
Ndërkohë, Policia e Shtetit bën me dije se kanë nisur verifikimet dhe do të vihen përpara përgjegjësisë ligjore e penale të gjithë punonjësit e policisë, të cilët kanë nxjerrë sekretin hetimor, duke ekspozuar detaje të një dosje në hetim.
Por kjo formë e zgjedhur për të demantuar akuzat e opozitës, nuk vlen shumë para bindjes së përgjithshme, se kultivimi i drogës në Shqipëri ka kapur majat. /tesheshi.com/
