Duke vijuar me turin e tij në përgatitje të protestës së 18 shkurtit, kreu i PD-së, Lulzim Basha u ndal në Durrës, aty ku qyteti drejtohet dhe nga një prej figurave më të fuqishme socialiste të pushtetit lokal, Vangjush Dako, Gjushi siç e thërrasin ndryshe.
Dhe, duke përfituar dhe nga fakti se në kantierin e ndërtimit të kompleksit “Vela” në hyrje të Portit, tek Torra, po dalin mbi sipërfaqe relike mesjetare, siç ishte së fundi një top, gjyle dhe godinë osmane, Basha i ka përqëndruar akuzat e tij në rafshin arkeologjik e trashëgimor.
Basha tha se po shkatërrohet pasuria arkeologjike e qytetit me një projekt, sipas tij, të paligjshëm e korruptiv të Edi Ramës dhe Vangjush Dakos, me të njëjtin kilent si në rastin e stadiumit “Qemal Stafa”.
“Në 18 shkurt i ftoj qytetarët e Durrësit që zemërimit të tyre t’i japin zë, që protestës së tyre t’i japin formë duke u bashkuar në Tiranë. Duke u ngritur bashkë në Tiranë për të garantuar zgjedhje të lira dhe të ndershme, përmes të cilave të sjellim një qeveri që nuk i shpenzon paratë e taksave të tyre për të mbushur xhepat e dyshes Dako-Rama, por i shpenzon për problemet e tyre akute që kurrë nuk kanë qënë më të mprehta për Durrësin dhe qytetarët e tij”, tha Basha. /tesheshi.com/
