Sot Rama, në kulmin e një mesazhi plot nerv duke paralajmëruar masa më të ashpra ndaj atyre që do guxojnë të shkelin ndalim-qarkullimin gati 48-orësh, ironizoi dhe vlonjatët duke u kujtuar atyre “kompetentin”.
“Më shkruanin nga Vlora se paskan vendosur të dalin sonte në ballkon në 19:00 të shajnë virusin nga motra. Çudi si duruan kaq gjatë që nuk u morën me motrën e kompetentit që po çmend botën, në pamundësi t’i bashkohem sot në ritualin e tyre luftarak, u jap mbështetjen time si deputet i Vlorës me kusht që ta bëjnë nga ballkoni e mos të bëjnë xhap jashtë derës së shtëpisë“, ishte ajo çfarë tha shefi i qeverisë.
Po cili është “kompetenti”?
Me “kompetent”, në narrativën socio-politike të 30 viteve, është nënkuptaur njeriu hije që qëndronte pas Sudes në kohën e piramidave. Se kush qe ai nuk u morr vesh kurrë. Ndërsa për vlonjatët, “kompetenti” është Vasil Ruci.
Me këtë cilësim e thërriste tifozeria vlonjate yllin e Flamurtarit të viteve ’80, njeriun që shkundi dhe rrjetën e Barçës së famshme e jo vetëm të atyre viteve.
Po pse e lidhi Rama “kompetentin” me atë që vlonjatët kishin planifikuar të shanin (nga motra) koronavirusin nëpër ballkone?
Historia është e tillë: në ato vite, Flamurtari kishte një përballje decizive me Skënderbeun e Korçës.
Ndeshja po shkonte në barazim 0-0. Ishte minuta e ’78. Vlonajtët fitojnë një penallti të artë, ku kandidatë për ta ekzekutuar ishin “disa lebër” në fushë, të cilët nuk e toleronin njëri-tjetrin. Tifozeria nga shkallët e stadiumit nisi të thërriste në korr që 11-metërshin duhej ta ekzekutonte pikërisht “kompetenti”, pra Vasil Ruci. Por ky i fundit e nxjerr jashtë topin dhe atë çast, drejt tij në korr nis një sharrje kolektive (nga motra). Mbas pak minutash ndodh mrekullia. “Kompetenti” shënon gol dhe tifozeria që gjer atë çast e kish shklyer Vasil Rucin verbalisht me “libër shpie”, ndërron kahje duke thënë, po në korr: “Na fal ‘kompetent’, …..(ashtu) jemi ne”. /tesheshi.com/
