Deri një vit më parë, askujt nuk i shkonte në mendje se në ato vise, ku kishin mbetur katër e pesë shtëpi, do të dyndeshin mbi një milion njerëz.
Dhe bëhet fjalë për fshatin Boletin në Mitrovicë, vendlindjen e bacës Isë, i cili prej një viti është shndërruar në një vend peligrinazhi për shqiptarët anekënd, si të ishte një “Mekë” e patriotizmës
Një vit pasi aty u rivarrosën eshtrat e Isës legjendar, llogaritet që mbi 1.3 milion vizitorë nga mbarë trojet shqiptare të kenë vizituar varrin dhe kullën e tij në Boletin.
“Fshati Boletin, pas rivarrosjes së eshtrave të gjeneral Boletinit dhe bashkëluftëtarëve të tij, i është kthyer gjallëria”, ka thënë Gazmend Boletini, stërnipi i Isës.
Boletini gjendet në pjesën veriore të Kosovës, në trevën e Shalës së Bajgorës, fshat ky që po thuajse ka qenë tërësisht i pabanuar nga braktisja.
“E tërë shqiptaria tanimë vjen këtu në Boletin. Vijnë këtu nga Çamëria, nga Lugina e Preshevës; vijnë shqiptarët e Maqedonisë, ata të Malit të Zi; në Boletin vijnë nga Vlora; pra më një fjalë e tërë Shqipëria”, ka thënë Gazmendi që tani është edhe ciceron në kullën e të parëve të tij.
Është e kuptueshme që nga 1.3 milion vizitorë, shumica dërmuese e tyre janë shqiptarë, por Gazmendi thotë se nuk kanë munguar as të huaj, që gjithashtu kanë vizituar varrin e Isa Boletinit dhe kullën e tij.
“Të gjithë këta vizitorë i kam pritur dhe përcjellë, por kënaqësinë më të madhe e kam pasur kur këtu ka ardhu një vizitor shumë i veçantë, një shqiptar nga një fshati i Kosturit të krahinës së Çamërisë”, ka thënë Gazmendi, por që ka dhënë disa arsye për të mos ia thënë emrin.
“Për shkak të kushteve politike dhe të sigurisë që mbretëron atje nuk mundem që ta bëjë publike emrin e tij, si dhe shkrimin që ka lënë ai këtu në librin e kujtimeve”, ka shtuar nipi-ciceron i Boletinajve.
Më tej, ai thotë se kënaqësi të madhe ka marrë dhe nga vizitat e shumta të nxënësve të shkollave, nga Shqipëria apo Kosova.
Të premten më 10 qershor bëhet një vit i plotë nga rivarrimi i eshtrave të Isa Boletinit; dhe për këtë përvjetor në oborrin e Kullës heroike do të mbahen shumë aktivitete kulturore.
Në qendër të tyre do të jetë një dokumentari në mbi jetën dhe veprën e heroit, të titulluar “Një shekull larg Boletinit”.
Më 10 qershor 2015, në Kullën e Isa Boletinit në Boletin, me ceremoni të mëdha shtetërore, u krye rivarrosja e eshtrave të Isës ; të dy djemve të tij, Halil dhe Zait Boletini; të dy nipërve, Jonuz Ahmet Boletini dhe Halit Ahmet Boletini, të dy miqve, Hajdar e Idriz Radishava; si dhe të kushëririt nga Isniqi, Misin Niman Balaj. /tesheshi.com/
