Coca Cola, duke u përpjekur të tregojë publikisht se nuk ka lidhje me Izraelin, ka publikuar një reklamë të re, e cila megjithatë ka shkaktuar reagime në Bangladesh.
Coca-Cola është një nga disa marka perëndimore që përballet me bojkotimin e konsumatorëve për shkak të lidhjeve të saj me Izraelin, duke financuar operacionet e tij ushtarake.
Ndërkohë, një armëpushim në Gaza është bërë një kërkesë pothuajse universale, me gjithnjë e më shumë shtete që njohin një shtet të pavarur palestinez dhe kritikojnë Izraelin, i cili vazhdon të bombardojë Gazën dhe të zhvendosë palestinezët nga shtëpitë e tyre. Ofensiva izraelite deri më tani ka vrarë më shumë se 37,000 palestinezë, ka shkatërruar rajonin dhe ka lënë më shumë se 2.3 milionë banorë të tij të pastrehë dhe në prag të urisë.
Siç raporton Independent, Coca Cola i ka mohuar akuzat, duke këmbëngulur se nuk financon asnjë luftë në asnjë vend.
Reklama që i kushtoi shitjet
Coca-Cola lançoi reklamën në gjuhën bengali të dielën për t’i “i dhënë fund keqinformimit” dhe për të rritur shitjet e goditura nga bojkotet prej kauzës palestineze.
Reklama tregon një shitës që pyet një klient të rregullt në një ditë të nxehtë nëse do të donte të pinte një Coca-Cola. Klienti thotë se ka ndaluar së piri sepse është nga “ai vend”, pa përmendur emrin e Izraelit. Shitësi fillon një kërkim për të gjetur burimin e informacionit, i cili rezulton të jetë një faqe e dyshimtë në Facebook. Ai u shpjegon vendasve se Coca-Cola nuk është “nga ai vend” dhe se konsumohet prej 138 vitesh në 190 vende, përfshirë Turqinë dhe Spanjën.
Në reklamë nuk përmendet se parlamenti turk në nëntor ndaloi produktet Coca-Cola dhe Nestle nga restorantet e vendit, por jo nga dyqanet, dhe se Spanja është ndër vendet që njeh pavarësinë e shtetit palestinez, ndërsa thotë se kompania “gjithashtu ka fabrika në Palestinë”.
Rezultatet nuk ishin ato që priste Coca Cola, pasi shitjet e saj në Bangladesh ranë me rreth 23%. Reklama u transmetua për herë të parë në Bangladesh gjatë ndeshjes së Kupës së Botës Twenty20 midis Indisë dhe Pakistanit të dielën. Që atëherë, bangladeshasit kanë dalë në rrugë dhe media sociale për të protestuar kundër reklamës propagandistike dhe kanë kërcënuar se do të intensifikojnë bojkotin.
Coca-Cola është akuzuar më parë se ka përfituar nga vendbanimet ilegale izraelite përmes fabrikës së saj të vendosur në Bregun Perëndimor të pushtuar. NPR raportoi në vitin 2018 se Zyra e Komisionerit të Lartë të OKB-së për të Drejtat e Njeriut identifikoi 206 kompani në mbarë botën që tha se mundësonin dhe përfitonin nga vendbanimet izraelite. /tesheshi.com/
