Trajneri i kuqezinjve Edi Reja publikoi listën e lojtarëve që ka ftuar për dy ndeshjet e radhës për Ligën e Kombeve, atë me 4 shtator përballë Bjellorusisë dhe tre ditë më pas me Lituaninë.
Reja veçoi thirrjen e Ramën Çepeles nga Interi, risi për kombëtaren shqiptare si prurje.
“Përsa i përket listës, Kumbullën e njihni të gjithë, unë i besoj që tani atij, është i rëndësishëm, përsa i përket Çepeles, unë kisha folur më parë me prindërit, ka qenë e vështirë se ka luajtur me Italinë, unë e shoh si lojtar që përbën një perspektivë shumë të mirë për Shqipërinë. Ka lindur në Itali. Duke qenë se janë rritur në vende të tjera, presin më parë një ftesë nga vendet përkatëse. Ka disa emra të tjerë interesantë, po presim”, tha italiani i pankinës shqiptare.
Ai shpjegoi gjithashtu se përse kishte thirrur 28 lojtarë.
“Lista është shumë e madhe, nuk e di si do të vijnë lojtarët, do i nënshtrohen testeve dhe nëse do të ketë ndonjë pozitiv apo do të ketë probleme fizike, atëherë lista do të pësojë ndryshime deri kur të nisemi për në Bjellorusi. Është një situatë e paprecedent, e paprovuar më parë, nuk patëm mundësi të bënim asnjë miqësore. Ne do të vijojmë të paktën me ato pika të sigurta që kemi pasur para se të ndërpritej futbolli. Sigurisht do të jetë e vështirë, shpresoj që të bëj zgjedhjet e duhura“, argumentoi Reja. /tesheshi.com/
