Nga Mensur Krasniqi
“Incidentet e deritanishme ndëretnike në Maqedoni kanë ndodhur si pasojë e moskujdesit të Ministrisë së Punëve të Brendshme.”
Kjo akuzë vjen nga kreu i Bashkësisë Fetare Islame të Maqedonisë, Reis Sulejman Rexhepi, i njohur si tejet luajal ndaj pushtetit maqedonas dhe madje i akuzuar për këtë, i cili u shpreh i bindur se me ndërrimin e kreut të MPB-së dhe me ardhjen e opozitës në krye të kësaj ministrie, nuk do të lejohet prishja e marrëdhënieve ndëretnike, sidomos në prag të zgjedhjeve të prillit të vitit të ardhshëm.
Ai gjithashtu foli edhe për politizimin e rastit Monstra.
“Është në të vërtetë se në të kaluarën ka pasur keqpërdorime, ka pasur ciklime, riciklime, ndezje të marrëdhënieve ndëretnike, ndërfetare, e shpeshherë edhe gjëra të imagjinuara dhe spekulime të ndryshme që nuk kanë të bëjnë aspak me të vërtetën, sikurse që kemi pasur rastin Monstra në Republikën e Maqedonisë. Këtu drejtëpërsëdrejt kam bindje që është e përzierë Ministria e Punëve të Brendshme e Maqedonisë ku nuk ka lidhje fanatizmi islam, radikalizmi islam dhe fundamentalizmi islam”, deklaroi Rexhepi.
Rexhepi nga Ohri shprehu edhe shqetësimin dhe dënimin për ngjarjet në Paris. Ai thotë se në metropolin francez ndodhi sulm ndaj njerëzve të pafajshëm.
Në Ohër mbahet takimi i myftinive të BFI-së në Maqedoni, ku diskutohet për çështje të ndryshme lidhur me funksionimin e Bashkësisë Islame në vend. /tesheshi.com/
