Klubi i natës ku u vranë 39 persona dhe u plagosën dhjetëra të tjerë është një prej më të famshmëve në Stamboll, në mos më i famshmi.
Me një pozicion të mahnitshëm, në brigjet e Bosforit, pranë këmbëve gjigande të një prej urave të varura të Stambollit, Reina mbledh elitën shekullare turke, si dhe të huajt e kamur që e vizitojnë Stambollin.
Reina gjendet në Ortakoj, në breg të detit, dhe ofron një pamje magjepsëse të qytetit. Të rinjtë e pasur të Stambollit, aktorët e serialeve të njohura turke, si dhe shumë futbollistë vendas e të huaj që luajnë me skuadrat e Stambollit, mund t’i ndeshësh lehtësisht në këtë klub nate.
Eshtë e vështirë të hysh në të; duhet të jesh i përgatitur mirë monetarisht, për shkak të shtrenjtësisë së lokalit, si dhe duhet të kesh një paraqitje pak a shumë të këndshme.
Festat në këtë klub janë të zëshme, dhe nuk fillojnë para mesnatës. Mes klientelës, vend të konsiderueshëm zënë të huajt. Nga 21 viktimat e identifikuara deri tani prej sulmit terrorist, 15 janë të huaj.
Sulmi me armë në klubin e natës ndodhi në një orë kur ai ishte i mbushur plot. Reina, një prej vendeve që ka shërbyer si pikëtakimi për elitën turke, do ta ketë të lidhur emrin pazgjidhshmërisht tani e tutje me aktin terrorist të orëve të para të 1 janarit të 2017-s. /tesheshi.com/
