Emigrantët kosovarë që kthehen në atdhe për pushimet verore mund të regjistrohen në qendrat e ngritura nga ministria e Diasporës, e cila po përgatit regjistrin e plotë të shtetasve të vendit që jetojnë në emigracion.
Këto pika regjistrimi në pikëkalimet kufitare, në aeroportin e Prishtinës, “Adem Jashari”, në qendër të Prishtinës dhe komunave të tjera, iu shtohen atyre që funksionojnë nëpër konsullatat e Kosovës nëpër botë.
Me këtë projekt, synohet të hartohet një listë e plotë dhe të nxirret një shifër e saktë e kosovarëve në emigracion. Formularët që duhen plotësuar, sipas zyrtarëve të ministrisë së Diasporës, janë të thjeshtë për t’u plotësuar.
Kjo ministri pritet të japë të dhënat e para për numrin e kosovarëve në mërgim në fillim të vitit 2017 pasi të përfundojë procesi i nisur më 23 Qershor të këtij viti.
Paraprakisht, nga një raport i Agjencisë së Statistikave të Kosovës, publikuar në vitin 2014, përqindja më e madhe e disporës është në Gjermani, me mbi 35 për qind.
Po sipas kësaj agjencie, në vitet 1969-2011, numri i emigrantëve ishte 550 mijë. Lëvizjet më të mëdha të popullsisë kanë ndodhur në vitet ’80-’90 të shekullit të kaluar. /tesheshi.com/
