Në 7 muajt e 2017-ës janë regjistruar 10645 biznese të reja pranë Qendrës Kombëtare të Biznesit, ndërsa qershori dhe korriku kanë numrin më të ulët.
Referuar të dhënave zyrtare të Ministrisë së Zhvillimit Ekonomik, Turizmit, Tregtisë dhe Sipërmarrjes (MZHETTS) në periudhën janar-maj numri mesatar i bizneseve të regjistruara është 1500-1800 , ndërsa në qershor shifra zbret në 1213.
Një nga arsyet kryesore të rënies së regjistrimeve gjatë qershorit është se ky ishte muaj zgjedhor, që ka një efekt psikologjik të provuar edhe në aspekte të tjera të ekonomisë, sidomos tek investimet.
Ky ngadalësim në hapjen e bizneseve të reja duket se është tejkaluar në korrik që, edhe pse me një nivel më të ulët sesa janar-maji, sërish ka ardhur në përmirësim në raport me muajin e gjashtë të vitit.
Në korrik, numri i bizneseve të reja të regjistruara ishte 1422, ndërsa rekordi është në janar me 1803 të tilla. .
Të dhënat zyrtare të MZHETTS, edhe pse reflektojnë një ngadalësim në periudhën zgjedhore dhe postzgjedhore, nxjerrin edhe një të dhënë tjetër interesante. Ndërkohë që qershori është muaji me më pak biznese të reja të regjistruara, në fakt është muaji që mban rekordin e bizneseve të regjistruara me kapital të huaj, raporton “Monitor”.
Këto të fundit, në qershor ishin 141, duke mbajtur 12% të totalit të bizneseve të regjistruara atë muaj. Ndërkohë që shifrat e janarit dhe deri në korrik luhaten mes 94 dhe 121 biznese të reja me kapital të huaj. Në total, për 7-mujorin janë hapur 820 biznese të huaja, ose gati 8% e totalit.
Qarqet në të cilat ka pasur edhe më shumë aktivitete të reja të çelura janë ato të Shqipërisë së Mesme, kryesisht Tiranë-Durrës ku është përqendruar edhe aktiviteti kryesor ekonomik i vendit. Tirana mban rreth 51% të numrit total të bizneseve të reja të regjistruara në QKB gjatë këtij 7-mujori ndërkohë që Durrësi ka 11%, ndjekur nga Vlora me rreth 10%. Kjo e çon totalin e këtyre tre qarqeve në 72%, ndërkohë që pjesa tjetër ndahet mes nëntë qarqeve të tjera ndahet grupi i mbetur që është më pak se 28%. /tesheshi.com/
