Futbollisti polak i Bayern Munich, Robert Lewandowski ka realizuar pesë gola përballë Wolfsburg duke hyrë në librin e rekordeve në Bundesligën gjermane. Por, Lewa nuk është futbollisti i vetëm që ka realizuar pesë gola në një ndeshje. Një gjë të tillë e kanë bërë më parë edhe Messi, Ronaldo, Morientes e të tjerë, por asnjëri nuk ka arritur t’i shënojë aq shpejt sa Lewandoëski.
“Tesheshi.com” ju njeh me futbollistët e tjerë që kanë realizuar pesë gola gjatë një ndeshje:
Kubala
Ladislao Kubala, legjenda e Barcelonës, shënoi pesëgolëshin e parë në kampionatin spanjoll, gjatë sezonit 1951/52, ndaj Celta Vigos. Këtë rekord e arriti për 19 minuta.
Bebeto
Sulmuesi brazilian shkëlqeu në fanelën e Deportivo La Corunas me pesë gola përballë Albacetes, në sezonin 1995/96.
Oleg Salenko
Oleg Salenko realizoi plot gjashtë gola me përfaqësuesen e Rusisë, gjatë kampionatit Botëror të mbajtur në Shtetet e Bashkuara të Amerikës në vitin 1994. Por, pesë i arriti vetëm gjatë një ndeshjeje, përballë Kamerunit në fazën e grupeve.
Alan Shearer
Legjenda e skuadrës angleze Newcastle United, Alan Shearer do të mbetet përgjithmonë në kujtesën e “laraskave” pasi realizoi pesë gola në përballjen me Sheffield United, në sezonin 1999/00.
Fernando Morientes
Sulmuesi spanjoll i Real Madridit, ka realizuar pesë gola gjatë duelit ndaj Las Palmaes në sezonin 2001/02, në Ligën spanjolle. Morientes pati mundësinë të realizojë edhe golin e gjashtë në ndeshje, por nuk arriti të finalizojë penalltinë.
Miroslav Klose
Sulmuesi më i mirë në histori të Kupës së Botës, gjithashtu ka të regjistruar një pesëgolësh të realizuar në kampionatin italian. Për 39 minuta, Klose realizoi pesë gola me fanelën e Lacios përballë Bolonjës në sezonin 2012/13.
Lionel Messi
Gjëja e vetme që i mungote Messit ishte realizimi i pesë golave gjatë një ndeshjeje. Këtë e arriti në duelin me Bayer Leverkusenin në çerekfinalen e Ligës së Kampionëve për 54 minuta.
Radamel Falcao
Ndërkohë sulmuesit kolumbian iu deshën 43 minuta përballë Deportivo La Corunas në sezonin 2012/13, për të realizuar pesëgolëshin e parë.
Cristiano Ronaldo
Cristiano Ronaldo është i veçantë. Ka arritur të realizojë në dy ndeshje nga pesë gola për një vit. I pari ishte ndaj Granadas më 4 prill të këtij viti (pas 58 minutave). Dhe, i dyti vjen ndaj Espanyolit (pas 73 minutave).
Emanuel Villa
”Tito” Villa ka shkëlqyer me pesë gola ndaj Hankook Verdes në Ligën e Kampionëve të Concacaf, në sezonin 2015/16. 54 minuta ishin të mjaftueshme për ta arritur këtë qëllim. /tesheshi.com/
