Autoritetet qeverisëse siriane e bënë të qartë dje se janë të gatshme të marrin pjesë në bisedimet e paqes në Gjenevë që do të zhvillohen në fund të këtij muaji, por më së pari kërkojnë të dinë se ç’palë do ta përfaqësojë opozitën atje.
Ministri i Jashtëm sirian, Velid Muallem, u takua dje me të dërguarin e OKB-së, Staffan de Mistura, dhe i kërkoi po ashtu atij një listë të grupeve që do të klasifikoheshin si terroriste.
Siç raportojnë mjetet shtetërore siriane të informimit, ministri i Jashtëm i tha të dërguarit të OKB-së se, “Siria është gati të marrë pjesë në takimet e Gjenevës në kohën e propozuar, duke konfirmuar domosdoshmërinë e sigurimit së listës së organizatave terroriste dhe listën e emrave të grupeve të opozitës siriane që do të marrin pjesë.”
Bisedimet e Gjenevës janë planifikuar për 25 janar, në një përpjekje për t’i dhënë fund konfliktit të përgjakshëm në Siri, por bombardimet e regjimit në zonat e banuara, si dhe përplasja e fundit mes Arabisë Saudite dhe Iranit, i kanë bërë më të pakta shpresat për një zgjidhje të shpejtë. /tesheshi.com/
