Qindra mijëra sirianë përballen me perspektivën e një rrethimi brutal brenda qytetit të Aleppos, pasi qeveria siriane dhe forcat ruse prenë edhe rrugën e fundit të sigurtë të furnizimit ndaj zonave të mbajtura prej kryengritësve. Organizatat e të drejtave të njeriut paralajmëruan se regjimi mund të përdorë të njëjtën strategji si ajo në disa qytete të vogla ku njerëzit vdiqën nga uria për të marrë nën kontroll edhe zonat e qytetit që janë ende nën kontrollin e kryengritësve.
Deri në 70 mijë njerëz janë larguar tashmë nga qyteti drejt kufirit me Turqinë, ku edhe pa ta, kampet e refugjatëve janë të mbipopulluara. Guvernatori i një prej provincave më të prekura nga fluksi i refugjatëve, Kilis, tha se më shumë se 35 mijë njerëz kanë mbërritur vetëm në 48 orët e fundit.
Gati gjysmë milioni njerëz ndodhen në rrezik brenda qytetit dhe që strehohen në kampet përgjatë kufirit me Turqinë, sulmi ndaj Alepos rrezikon të krijojë një nga krizat më të vështira humanitare të luftës pesëvjeçare në Siri, paralajmëroi një nga organizatat më të mëdha të ndihmës që punojnë në zonë.
Nëse forcat qeveritare vendosin bllokadën, kjo do të dyfishonte brenda natës numrin e njerëzve që jetojnë nën rrethim.
“Sot, afërsisht 400 mijë persona jetojnë në zonat që nuk kontrollohen nga qeveria dhe ne presim që kjo shifër të mbetet e njëjtë pasi ata që kanë qenë në gjendje të zhvendosen, tashmë duhet të jenë larguar nga qyteti”, tha Dalia al-Awqati, drejtuese e programeve Mercy Corps në veri të Sirisë. “Ka shqetësim të thellë mes gjithë organizatave të ndihmave, për shkak të mundësisë së një rrethimi të qytetit”.
Mercy Corps është organizata e dytë më e madhe pas OKB për shkallën e ndihmës që jep në zonat e Aleppos, dhe ka ushqyer më shumë se 66 mijë njerëz brenda në qytet, por paralajmëron se për shkak të luftimeve të fundit “operacionet e ndihmës në veri të Sirisë janë reduktuar përgjysme”.
“Rruga kryesore e furnizimit nga veriu është bllokuar. Një tjetër rrugë ekziston, mirëpo është e përkohshme dhe e rrezikshme”, thotë Awqati.
Qeveria sirianë dhe palët të tjera në konflikt kanë përdorur taktikën e rrethimit përgjatë gjithë kohës së luftës, dhe një raporti i fundit i OKB-së vlerëson se 400 mijë njerëz janë izoluar pa ushqim dhe furnizime të tjera nga grupimet e armatosura, pjesa më e madhe nga trupat e ISIS dhe të qeverisë.
Përparimi i shpejtë i trupave qeveritare në Aleppo ka krijuar trazira në afërsi të kufirit turk, ku OKB vlerëson se janë 20 mijë të sapombërriturit të cilët i shtohen 30 mijë njerëzve që tashmë jetojnë në tenda.
Marrja e Aleppos do të ishte një fitore e madhe strategjike për trupat qeveritare të Damaskut dhe mbështetësit e tyre rusë, për shkak se qyteti ka qenë një bastion i kryengritësve që nga nisja e luftës. Por, ky përparim përmes zonave rurale drejt zemrës së qytetit do të rezultojë me beteja të përgjakshme. Përgatiti: Juli Prifti – /tesheshi.com/
