Të paktën 60 persona janë vrarë dhe me dhjetëra janë plagosur në disa sulme ajrore të regjimit sirian në periferinë e Damaskut, Ghouta Lindore, e cila mbahet nga kryengritësit.
Burime spitalore thanë se avionët sirianë shkatërruan edhe një numër ndërtesash, ndërsa janë vrarë civilë dhe rreth 200 persona janë plagosur.
Ndërkohë, Komisioni Europian dënoi vrasjen e civilëve në Siri ndërsa lufta civile në këtë vend ka hyrë në vitin e pestë.
Konflikti në Siri që e ka ndarë vendin mes fraksioneve kundërshtare, nisi në fillim të vitit 2011 kur regjimi i presidentit Assad iu përgjigj me ashpërsi protestave që shpërthyen si pjesë e trazirave të “Pranverës Arabe”.
Që prej asaj kohe, pothuajse gjysma e popullsisë është zhvendosur nga dhuna, dhe gati katër milionë sirianë tashmë janë refugjatë në vendet fqinje, sidomos në Turqi, Liban, Jordani e Irak.
Sipas të dhënave të OKB-së, më shumë se 220 mijë persona kanë humbur jetën në këtë konflikt. /tesheshi.com/
