Një gjykatë franceze ka marrë vendim që të mbyllë një supermarket në periferi të Parisit, pasi pronari nuk plotësoi kërkesën për shitje të produkteve të mishit të derrit dhe alkoolit.
Supermarketi ishte vënë në kritika në gusht të vitit të kaluar nga Nicole Goueta, kryebashkiakja e Colombes dhe autoritetet lokale, me arsyetimin se “supermarketi nuk i shërbente publikut të gjerë”.
Çështja u dërgua në gjykatë pasi pronari i supermarketit kundërshtoi akuzat se ai ishte “diskriminues” dhe nuk po ndiqte kushtet për dhënien me qira të saj, që përcaktonin se supermarketi duhet të veprojë si një “dyqan i përgjithshëm ushqimor”.
Gjykata tha se dyqani nuk kishte shtuar alkoolin dhe mishin e derrit në gamën e produkteve dhe në këtë mënyrë shkelte kontratën e qirasë dhe vendosi për anulimin e saj, duke urdhëruar pronarin e dyqanit të paguajë tarifa gjyqësore prej 4,000 euro, dhe zbrazjen e lokalit.
Paralajmërimet për dyqanin erdhën pasi vendorët u ankuan se ata nuk mund të furnizohen më një gamë të gjerë produktesh në tregun tani “hallall”, i cili kishte zëvendësuar një supermarket të rregullt, dhe duhej të udhëtonin më tej për t’u furnizuar me produktet që dëshironin.
Pronari i dyqanit i kishte thënë Le Parisien se nuk kishte shitur mish derri as alkool, sepse ai kishte marrë parasysh balancën e kërkesës dhe ofertës në lagje.
Shumë nga mediat sociale dolën në përkrahje të pronarit, duke thënë se kishte shumë dyqane të posaçme në Francë, të cilat shisnin vetëm produkte të caktuara dhe se insistimi i autoriteteve ishte një praktikë “diskriminuese”. /tesheshi.com/
