Kryeminsitri Albin Kurti refuzoi një tjetër ftesë të presidentit Thaçi për t’u takuar, me qëllim përafrimin e qëndrimeve për sfidat e momentit të Kosovës.
“Në shërbim të obligimeve kushtetuese dhe përgjegjësive kombëtare dhe qytetare edhe dje e kam ftuar që të takohemi dhe të bisedojmë për zhvillimet e reja që janë dramatike dhe shqetësuese për vendin. Edhe sot përsëri pati refuzim për të ardhur për tri a katër mundësitë e ofruara që të takohemi në disa termine. Do të ishte në interes që të gjithë të shpenzojmë energji për përafrim të hapave që do të ndërmarrim.
Kosova nuk është pronë e një individi apo grupi, është atdhe i gjithë qytetarëve dhe e çdo lideri me përgjegjësi qytetare dhe parlamentare. Duhet të punojmë dhe të shkojmë përpara me qëndrime unike që është zhvillimi ekonomik dhe ruajtja si sytë e ballit e partneritet strategjik me aleatët perëndimorë e në veçanti me adresën e kontributit madhor për lirinë dhe pavarësinë e Kosovës, me SHBA-të”, tha Thaçi, në përgjigje të asaj çfarë po paralajmërojnë amerikanët e zemëruar me Kurtin; një tërheqje të mundshme.
Megjithatë, Thaçi tha se kjo nuk do të ndodhë.
“Më lehtë çdo lider i Kosovës do të shkojë në shtëpi të vet, do të pensionohet para kohe, sesa që do të largohen trupat amerikane nga Kosova”, tha Thaçi.
Megjithatë, ai shtoi se paralajmërimet duhen marrë seriozisht.
“Janë mesazhe serioze që duhet të merren shumë seriozisht dhe nuk ka temë ditore të politikes elektorale në Kosove që mund ta sfidojë partneritetin e qytetarëve të Kosovës me Amerikën.Të gjithë liderët në Kosovë janë të zëvendësueshëm. Raportet me SHBA-të janë të pazëvendësueshme. Kush mundohet t’i sfidojë raportet me SHBA-të për interesa politike ditore është i gabuar”, theksoi kreu i shtetit të Kosovës.
“Prandaj, mesazhi është që kryeministri duhet të merr vendimet që i takojnë dhe janë në përputhshmëri me interesin e qytetarëve të Kosovës dhe të mos vonohet në vendimmarrje që e çojnë vendin në drejtim të gabuar historik, por në atë drejtim që të jemi pjesë e NATO-s dhe e BE-së”, theksoi Thaçi. /tesheshi.com/
