Lufta tregtare që ka shpërthyer mes Serbisë dhe Kroacisë e që e ka zanafillën tek fluksi i refugjatëve në kufirin mes tyre, i ka sjellë marrëdhëniet mes dy vendeve në nivelin më të ulët që nga rrëzimi i Millosheviçit.
Korrespondentët thonë se fqinjët ballkanikë po shkëmbejnë replika ndërsa vendosin sanksione nddaj njëri-tjetrit. Së fundmi, Serbia ndaloi hyrjen në territorin e saj të prodhimeve dhe mjeteve të transportit nga Kroacia ndërsa të njëjtën gjë kishte bërë Kroacia, e cila është anëtare e BE-së që prej vitit 2013.
Qytetarët serbë janë kthyer pas në kufirin me Kroacinë, edhe pse ministria e Brendshme kroate fajësoi për këtë një problem në sistemin kompjuterik.
Kroacia e cila ishte në luftë me rebelër serbë të mbështetur nga Beogradi gjatë viteve 1991-1995, i kërkoi Serbisë të ndalojë kalimin e dhjetëra mijë refugjatëve drejt kufirit që ndan me Kroacinë, duke thënë se nuk mund të përballojë fluksin.
Zagrebi thotë se Serbia duhet t’i dërgojë refugjatët edhe drejt Hungarisë dhe Rumanisë, ndërsa javën që shkoi mbylli shtatë nga tetë pikat e kalimit kufitar me Serbinë për mjetet. Më pas, Zagrebi e mbylli tërësisht trafikun e mallrave në një përpjekje për t’i bërë presion Beogradit.
Pas skadimit të afatit që Beogradi kishte lënë për heqjen e embargos, ky i fundit ndaloi të gjithë hyrjet e mjeteve kroate të transportit dhe mallrat kroate.
Kroacia u kundërpërgjigj duke ndaluar kalimin e mjeteve të regjistruara në Serbi, madje nisi të kthejë edhe qytetarët që mbanin pasaporta serbe. /tesheshi.com/
