Ministrat e BE-së do të bëjnë sot një përpjekje më shumë për të zgjidhur konfliktin sesi të rishpërndajnë 120 mijë azilkërkues që kanë mbërritur në Europë.
Një grup shtetesh nga pjesa qendrore e Europës bëjnë rezistencë ndaj kuotave të detyrueshme të propozuara më herët. Hungaria që mban linjën më të ashpër për këtë problem, paralajmëroi një ditë më parë se kufijtë e Europën janë vendosur nën kërcënim.
Ndasitë e mëdha që solli kriza e refugjatëve në Europë, nuk kanë marrë ende një përgjigje dhe refugjatët po udhëtojnë mes kufijve që mbyllen nga njëri shtet në tjetrin, pa asnjë organizim nga Brukseli.
Por, tashmë, duket se presioni është i madh dhe në rast se nuk zgjidhen mosmarrëveshjet mes shteteve, pakti për rishpërndarjen e refugjatëve mund të vendoset me votim nga shumica. Ka mjaftueshëm vende që të formojnë një shumicë për të mbështetur propozimet e Komisionit Europian për kuota të detyrueshme për refugjatët, ndërsa përpjekjet janë ende të mëdha për të gjetur kompromis.
Një përpjekje të tillë do të bëjnë ministrat e Brendshëm të BE-së që takohen sot, për të mos e lënë në dorë të votimit vendimin, kur liderët e BE-së të takohen të mërkurën.
Liderët mund të marrin vendime vetëm mbi baza unanime, dhe synojnë të fokusohen për probleme më të gjera si siguria e kufijve dhe ndihma shtesë për vendet në Lindjen e Mesme që kanë sjellë edhe krizën e refugjatëve. /tesheshi.com/
