Greva e urisë është veprimi më i fundit i refugjatëve të mbetur të bllokuar në kufirin mes Greqisë dhe Maqedonisë. Kjo grevë, e bashkëshoqëruar dhe me qepjen e buzëve, është në shenjë proteste për nisjen e përzgjedhjes së tyre nga autoritetet vendore, që kanë vendosur të mos i pranojnë të cilësuarit “emigrantë ekonomikë”.
Grevistët e urisë gjenden mes mijëra refugjatëve në pikën kufitare të Idomenit. Imazhet e përcjella në mediat sociale i japin ata teksa qepin buzët e shoqi-shoqit.
Protesta kryesore është ndaj masave të vëna në veprim nga 17 nëntori prej katër qeverive të Ballkanit, që nuk do të lejojnë kalimin e refugjatëve që nuk mund ta provojnë se janë qytetarë të Sirisë, Afganistanit apo Irakut.
Vendimi i Sllovenisë, Maqedonisë, Kroacisë dhe Serbisë ka sjellë grumbullim të refugjatëve në kalimet kufitare, çka e ka shtuar ndjeshëm tensionin.
Gjendja më e nderë është në pikën kufitare të Idomenit, ku rreth 2000 iranianë, marokenë e të tjerë kanë mbetur të bllokuar pasi u lejua vetëm kalimi i refugjatëve sirianë, afganë dhe irakianë. /tesheshi.com/
