Fluksi i refugjatëve përmes Ballkanit dhe Europës Qendrore nuk është pakësuar për shkak të rivendosjes së kontrolleve kufitare, por vijon me të njëjtat ritme.
Pavarësisht masave të ndërmarra nga shumë shtete europiane, disa prej të cilave edhe drastike si në Hungari, asnjë ndikim nuk është ndjerë në numrin e personave që mbërrijnë në Europë.
Më shumë se 6 mijë refugjatë kanë hyrë deri më tani në Kroaci, e cila është bërë vatra e re e krizës, pasi Hungaria mbylli kufijtë.
Vetëm të mërkurën, në Gjermani hynë 7266 refugjatë kryesisht nga Siria, Iraku dhe Afganistani, shtete të përfshira nga konfliktet dhe pasiguria për jetën.
Hungaria tashmë, është bërë për herë të dytë skenë e përleshjeve të dhunshme me refugjatët, në skena që janë dënuar ndërkombëtarisht.
Parlamenti Europian, nga ana e tij, i dha mbështetje planit të KE-së për shpërndarjen e 120 mijë refugjatëve me kuota të detyrueshme për vendet anëtare të bllokut. Një gjë e tillë, thonë analistët, mund të nxisë miratimin e kuotave ndërsa vendos në presion BE-në për të lëvizur shpejt në përballimin e krizës së refugjatëve.
Në Kroaci, vend që ka njoftuar se mirëpret refugjatë, situata për momentin është nën kontroll, mirëpo fluksi i vazhdueshëm në shifra të larta mund të sjellë edhe aty destabilitet.
Ministri i Brendshëm kroat paralajmëroi se autoritetet janë në kontroll të situatës, mirëpo numri në rritje i refugjatëve që kalojnë kufirin mund të bëjë që të ketë një qasje të ndryshme në ditët e ardhshme. /tesheshi.com/
