Ndryshe mijëra refugjatëve që vijojnë të vërshojnë në Europë, shumë irakianë të gjendur në Finlandë kanë nisur të anulojnë aplikimet për azil dhe të kthehen vullnetarisht në vendin e tyre.
Numri i azilkërkuesve u rrit me gati dhjetëfish vitin e shkuar në Finlandë, nga vetëm 3.600 kërkesa për azil në 2014-ën në 32.500 në 2015-ën, dhe dy të tretat e azilkërkuesve ishin të rinj irakianë.
Sipas asaj çka deklarojnë autoritetet përkatëse finlandeze, deri tani i kanë anuluar aplikimet 4.100 azilkërkues, e ky numër pritet të shkojë në 5.000 muajt e ardhshëm. Javën tjetër do të nisin dhe fluturimet e posaçme për në Bagdad, për t’i kthyer ata që kanë hequr dorë nga kërkimi i azilit.
Zhgënjimi nga jeta në Finlandë, procedura e zgjatur e azilit, ushqimi i papërshtatshëm, moti i ftohtë, e ndjenja e të qenit jo të mirëpritur, janë mes shkaqeve për vendimin e një numri të madh azilkërkuesish irakianë për t’u kthyer nga kanë ardhur.
Ndërsa rreth 80 për qind e atyre që kthehen janë irakianë, një numër i papërfillshëm janë nga Siria dhe Afganistani. 22 nga 877 sirianët e 35 nga 5.214 afganët që kërkuan azil vitin e shkuar kanë kërkuar të kthehen në vendin e tyre.
Edhe pse ka kushte lehtësuese e ndihmë financiare për ata që kthehen vullnetarisht, shumica e irakianëve e paguajnë vetë fluturimin, ose kërkojnë ndihmë në ambasadën e vendit të tyre në Helsinki. /tesheshi.com/
