Në respekt të një tradite, Emmanuel Macron ka vizituar dje Berlinin, në të parën dalje jashtë vendit pas nisjes së detyrës si president i Francës.
E ngrohtë qe pritja për të nga kancelarja gjermane Angela Merkel. Me një gjuhë të përbashkët, dy udhëheqësit kanë premtuar të punojnë së bashku për skicimin e një harte të rrugës së reformave në BE.
“Ne përfaqësojmë interesat e vendeve tona, por interesat e Gjermanisë janë natyrshëm të lidhura ngushtë me interesat e Francës,” do të shprehej Merkel.
Macron, nga ana e tij, do të fliste mbi nevojën për të punuar për reforma të thella që janë të nevojshme e që kërkojnë veprim të përbashkët.
Mikpritësja gjermane dhe miku francez lanë të kuptohet se ishin të përgatitur të bënin dhe ndryshime në traktatet europiane; Merkel do të ishte megjithatë më e rezervuar.
“Së pari nevojitet të punojmë mbi atë se çfarë duam të ndryshojmë, e nëse rezulton se është i nevojshëm një ndryshim traktati, jemi të përgatitur për ta bërë këtë,” do të thoshte ajo.
Siç nënvizon agjencia e lajmeve AFP, vizita përçoi synimet e Macron-it për t’iu kushtuar shpejt përmbushjes së premtimeve të fushatës elektorale për përtëritjen e mbështetjes për Bashkimin Europian.
Ndërkohë që përpara zgjedhjes si president, Macron kishte kërkuar reformim të BE-së për të shmangur një Frexit të mundshëm, ai ka bërë thirrje në vizitën në Berlin për një rindërtim historik të unionit europian, duke patur parasysh rrezikun e amullisë dhe të shpërbërjes së tij. /tesheshi.com/
