Politika nuk po tregon përgjegjshmëri për bërjen e një reforme të plotë zgjedhore. Ky është qëndrimi i ish kreut të KQZ-së, Kristaq Kume, i cili shprehet se aktualisht nuk po bëhet një reformë në Kodin Zgjedhor, por vetëm teknikisht ky kod po përshtatet me ndarjen e re administrative.
“Maxhoranca dhe opozita nuk i gjetën dot fjalën e përbashkët për ta realizuar këtë proces, procesin e reformës zgjedhore. Arsyet dhe argumentat pse janë për mendimin tim janë vetëm justifikuese dhe jo të qënësishme. Jemi absolutisht larg zbatimit dhe të rekomandimeve të Komisionit të Venecias, që lidhet me faktin që ndryshimet në legjislacionin zgjedhor nuk duhet të bëhen 6 muaj para zgjedhjeve të radhës. Dhe kërkesa për një afat të tillë kohor ka nga mbrapa shumë arsye pse kërkohet të bëhet e tillë. Administrata zgjedhore nuk duhet të vihet në vështirësi”, tha Kume.
Kume e sheh bllokues propozimin e kuvendit, që për cdo bashki të ketë 1 qendër numërimi, ndërsa Tirana vetëm 3 të tilla. “Nëse i gjithë dokumentacioni zgjedhor do të përqëndrohet në një vend numërim, fizikisht kam përshtypjen se do të jenë shumë të mëdha për ta administruar procesin. Një përqëndrim i tillë i procesit të vlerësimit dhe numërimit të votave në kushtet e këtyre njësive të mëdha që ne kemi, do ta vështirësojë goxha procesin dhe rezultatet do ti marrim me goxha vonesë”, thotë Kume.
Por cfarë është e nevojshme të ndryshohet në Kodin Zgjedhor në mëmyrë që të mos përsëriten situatat e zgjedhjeve të shkuara? “Anëtarëve të KQZ me ligj tu ndalohej dhënia e dorëheqjes, mos tu pranohej dorëheqja nëse kjo jepet, pasi është dekretuar data e zgjedhjeve të radhës. Mund të shihej mirë dhe përfshirjen në procesin e administrimit të ankimeve edhe të gjykatave të faktit, gjë që do të bënte të çlironte KQZ një ngarkesë e madhe pune”, vijon Kume.
Mazhoranca hoqi dorë nga bërja e ndryshimeve në Kod, duke ja kaluar këtë përgjegjësi Komisionit Qëndror të Zgjedhjeve. Ky i fundit ja përcolli këtë detyrë Kuvendit, i cili po punon për amdneimet përkatëse.
