Tashmë që politika ka rënë dakord për nisjen e reformës elektorale, ekspertë të Kodit Zgjedhor, mendojnë se fillimi në kohë i rishikimit të legjislacionit është i rëndësisë së veçantë.
Për Ilirjan Celibashin, ish-drejtues i KQZ-së, politika nuk duhet të bëjë gabimin t’i lë ndryshimet ligjore për momentin e fundit. E sa i takon sistemit elektoral, ai është i mendimit të rikthimit të ndarjes së mandateve për deputet si në zgjedhjet e 2005-ës.
“Në vlerësimin tim ai ka qenë një sistem shumë i mirë dhe i shkonte shumë për shtat pikëpamjes historike. Nga një anë siguronte një qeverisje të qëndrueshme dhe nga ana tjetër krijonte mundësitë që të kishte zëra përfaqësues në parlamentin shqiptar.
Nuk duhet parë teknologjia si komponent që lidhet drejtpërsëdrejti me besimin, duhet parë si një komponent që lehtëson, krijon edhe besim deri diku, por pasi ti i ke përmbushur disa standarte të tjera. Perosnalisht mendoj që Shqipëria nuk është e përgatitur për votimin elektronik, gjithmonë kjo duke konsideruar çështjen e sigurisë”, tha Celibashi.
Pak ditë më parë, OSBE/ODIHR publikoi raportin përfundimtar të vlerësimit për zgjedhjet e 25 qershorit. /tesheshi.com/
