Kryeministri Edi Rama ka qenë i pranishëm ditën e sotme në një aktivitet me të rinjtë e qytetit të Durrësit, ku foli për anëtarësimet e reja në Partinë Socialiste, por nuk la pa përmendur edhe reformat e mëdha që qeveria është duke ndërmarrë.
“Reformat e mëdha dhe puna që kemi bërë për t’i çuar përpara ato kanë vendosur një bazë dhe trupi i sëmurë i ekonomisë që neve na u besua për ta operuar dhe kuruar përpara dy vite e gjysmë, ka dhënë shenjat e ripërtëritjes. Duhet ende shumë punë që ky trup të fillojë të vrapojë. Ka arsye për të besuar se Shqipëria mund të bëhet vendi ku prindërit të mos kenë frikë të investojnë kursimet e tyre për arsimin e fëmijëve”,- tha Rama.
Ai shtoi se Shqipëria mund të bëhet vendi ku krimi nuk bën ligjin, por ligji ndëshkon krimin, ndërsa shtoi se ka shumë arsye për të besuar se spitalet e Shqipërisë të bëhen hapësirat e mikpritjes dhe shërimit.
“Arritjet tona nuk janë arsyet për të thënë se e bëmë natën ditë, ferrin parajsë dhe tani e kthyem Shqipërinë në oazin e lulëzimit të zhvillimi ekonomik, por po punohet shumë për të ndryshuar realitetin”, deklaroi Rama.
Kreu socialist shtoi më tej se Partia Socialiste sot është me gojën plot, kur troket në derën e një biznesi të vogël, ku ka një familje të vetëpunësuar sepse mund t’i thotë se taksa jote është zero, sepse është PS ajo që qeverisin vendin. /tesheshi.com/
