Kryetari demokrat, Basha reagi sot në lidhje me një deklaratë të një dite më parë të kryeministrit Rama, duke thënë se ai kërkon armiqësi të reja menjëherë pas konsensusit.
“Nuk kaloi shumë nga marrëveshja historike në parlament për Reformën në Drejtësi, dhe Edi Rama shfaqet tërë entuziazëm sikur ka zbuluar një vatër të re konflikti. Ç’është ky njeri që e zë konsensusi? Që e sëmur rënia dakord me opozitën për interesat e mëdha të vendit dhe vrapon të shpikë armiqësi te reja? Kontrata më e madhe nën të cilën jemi, është Kushtetuta. Kushtetuta ka përcaktuar afate për kalimin e ligjeve. Dhe asgjë e drejtë e në emër të drejtësisë, s’mund të bëhet duke shkelur Kushtetutën. Ekspertët e opozitës janë në punë çdo orë të ditës dhe po shqyrtojnë edhe ligjin e “Vetingu”-t që ka mbërritur afër mesnatës, dy ditë më parë. I gjithë procesi ka tashmë një lider, të konfirmuar, të pakontestuar, të gjithëpushtetshëm. Ky lider nuk është as Edi Rama, as Lulzim Basha, e aq më pak Fatmir Xhafaj. Por është konsensusi”, tha Basha.
Dhe sipas kreut të opozitës shqiptare, konsensusi është rruga nga duhet të kalojnë ligjet. “Opozita s’ka asnjë minutë kohë për të harxhuar me debate shterpë e as ti përgjigjet llogoreve të reja që gërmon Edi Rama. Punë dhe rezultate, ky është angazhimi ynë. Nuk kemi asnjë minutë kohë, sepse teksa shfaqet si komentator drejtësie, çka në të vërtetë nuk është, se nuk ia ka haberin fare, kërkon të fshehë plojën e madhe të vendit, të zhytur në mjerim, papunësi e mungesë shprese”, theksoi Basha.
Debatet e nxehta politike për reformën në drejtësi, janë rikthyer pas kërkesës së ndërkombëtarëve, që ligjet e saj të aprovohen menjëherë në parlament, dhe që procesi I vettingut të nisë nga puna sa më shpejt, pra riformatimi human i gjithë piramidës së drejtësië. /tesheshi.com/
