Raportuesi për Shqipërinë në Parlamentin Evropian, Knut Fleckenstein, ka hedhur poshtë deklaratat e bëra nga kreu i Komisionit për Çështjet e BE-së në Bundestagun gjerman, Gunther Krichbaum rreth një javë më parë në Tiranë. I pranishëm në forumin e përbashkët ekonomik Shqipëri-Gjermani të zhvilluar në Berlin, pjesë e së cilës ishte edhe ministrja e Zhvillimit Ekonomik, Milva Ekonomi, eurodeputeti tha se do të çojë në BE mesazhe pozitive përsa i përket reformës në drejtësi.
“E kam vizituar Shqipërinë disa herë. Çdo herë kam takuar përfaqësues të qeverisë shqiptare, përfaqësues të partive politike apo shoqërisë civile për të diskutuar përgatitjet e Shqipërisë për anëtarësimin në BE dhe per reformat e nevojshme. Sigurisht reforma ne drejtësi është me ambiciozja që Shqipëria ka parë në 25 vitet e fundit. Dua të falenderoj të gjitha ata që kanë kontribuar deri tani për këtë reformë”, tha Fleckenstein, duke kujtuar se shqiptarët duan një sistem drejtesie, që të mbrojë të drejtat e tyre, që t’u japë të shance të barabarta të gjithëve.
Fleckenstein tha se qeveria shqiptare tashmë ka ndërmarrë disa iniciativa, por vetëm një sistem profesional drejtesie do garantojë aksionet e sotshme të qeverisë ndaj krimit të organizuar dhe korrupsionit.
“Një qeverisje më e mirë e ligjit, do ta bëjë më të lehtë dhe biznesin në Shqipëri, do tërheqë investimet, do krijojë rritje të qëndrueshme dhe të krijojë vende pune, duke u dhënë njerëzve një jetë më të mirë në vend. Gjithashtu kjo reformë do të jetë një test për klasën politike shqiptare, të cilët duhet të sigurojnë që reforma në drejtësi të jetë e pavarur nga ndikimi i politikës dhe korrupsioni. Është detyrë e shtetit shqiptar kundrejt qytetarëve të saj”, tha Fleckenstein.
Ai foli dhe për rolin bashkëpunues që Shqipëria duhet të ketë në rajon, duke nxitur kështu projekte të përbashkëta ekonomike. Duke kujtuar modelin e BE-se të krijuar mbi parimet e solidaritetit dhe bashkëpunimit, ai tha se çdo iniciativë që forcon bashkëpunimin mes Shqipërisë dhe vendeve të rajonit është kontribut për të ardhmen europiane të vendeve të Ballkanit Perëndimor.
Nga ana tjetër, ministrja Ekonomi ftoi sipërmarrësit gjermanë të investojnë në Shqipëri, pasi sipas saj, vendi ka një klimë të favorshme.
“Sektori i energjisë ka nevojë për investime, pasi kemi shumë ujë dhe ditë me diell, por nuk përdoren siç duhet, ndaj ky sektor duhet të zhvillohet më tej. Së dyti, sektori i transporteve, që nuk është i rëndësishëm vetëm mes lidhjen me vendet e rajonit, por dhe brenda vendit, pasi infrastuktura ende ka nevojë për përmirësim, veçanërisht për zhvillimin e turizmit në çdo skaj të vendit”, tha ministrja.
Duke folur për turizmin, Ekonomi theksoi se ky sektor ka potencial të madh për investime, pasi Shqipëria ka gjithçka: detin, malin dhe turizmin kulturor. Ajo zhvilloi dhe një takim me Christian Wiesenhutter, zv. kryetarin e Dhomës së Tregtisë dhe Industrisë së Berlinit me të cilin diskutoi për rritjen e bashkëpuinimit dhe nxitjen e investimeve gjermane./tesheshi.com/
